وزیرخزانہ اسحاق ڈارکی ازبکستان کے صدر شوکت مرزایوف سے ملاقات، پاکستان کی بندرگاہوں تک جانے وا لی ریلوے لائن کی تعمیر کے منصوبے کو تیز کرنے کی ضرورت پر زور
جمہوریہ ازبکستان کے صدر شوکت مرزایوف نے ازبکستان اور پاکستان کے درمیان شاہراہوں پر آمدورفت کو ترقی دینے، وسطی اور جنوبی ایشیا کو افغانستان سے ملانے اور پاکستان کی بندرگاہوں تک جانے والے ریلوے لائن کی تعمیر کے منصوبے کو تیز کرنے کی ضرورت پر زور دیا ہے۔
شوکت مرزایوف نے ان خیالات کا اظہار تاشقند میں وفاقی وزیر خزانہ سینیٹر اسحاق ڈار کی قیادت میں پاکستانی وفد سے ملاقات میں کیا۔
ملاقات میں باہمی فائدہ مند تعاون کو مزید وسعت دینے کے لیے تجارت، سرمایہ کاری اور ٹرانسپورٹ کے شعبوں میں منصوبوں پر عمل درآمد کے عملی پہلوں پر بھی تبادلہ خیال کیا گیا۔
وزیرخزانہ نے ازبکستان کے صدرک کو وزیراعظم شہبازشریف کی طرف سے نیک خواہشات کا پیغام پہنچایا۔ملاقات میں ٹرانزٹ اور ترجیحی تجارت کے حوالے سے اہم معاہدوں پر عمل درآمد کا جائزہ لیا گیا۔
ملاقات میں معیشت کے مختلف شعبوں میں تعاون کے مخصوص منصوبوں کو فروغ دینے کی اہمیت کو بین الحکومتی مذاکرات کے ایجنڈے کے حصے کے طور پر شامل کرنے سے اتفاق کیاگیا۔
