قومی احتساب بیورو (نیب) کی ٹیم چیئرمین پاکستان تحریک انصاف عمران خان سے 190 ملین پاؤنڈ اسکینڈل کی تفتیش کے لیے اڈیالہ جیل پہنچ گئی۔
ذرائع کے مطابق نیب ٹیم میں تفتیشی آفیسر میاں عمر ندیم، کیس آفیسر عاصم منیر، پراسیکیوٹرز روح الامین اور ہارون بلوچ شامل ہیں۔
جیل ذرائع کے مطابق نیب ٹیم پی ٹی آئی چیئرمین عمران خان سے 3 روز تک اڈیالہ جیل میں تفتیش کرے گی۔
مزید پڑھیں
جیل ذرائع کا کہنا ہے کہ نیب ٹیم کی تفتیش کے بعد فریقین کو بھی دوبارہ سنا جائے گا۔
واضح رہے کہ اسلام آباد کی احتساب عدالت نے 190 ملین پاؤنڈ اسکینڈل میں چیئرمین پی ٹی آئی عمران خان کے وارنٹ گرفتاری جاری کیے تھے جس کے بعد نیب ٹیم نے اڈیالہ میں ہی ان کی گرفتاری عمل میں لائی۔
عمران خان کے وارنٹ جاری ہونے کے بعد وزارت قانون نے چیئرمین پی ٹی آئی کے جیل ٹرائل کا نوٹیفکیشن جاری کیا تھا۔ احتساب عدالت کے جج محمد بشیر نے جیل میں سماعت کرتے ہوئے عمران خان کا جوڈیشل ریمانڈ منظور کیا تھا۔
یہ بھی یاد رہے کہ عمران خان اس سے قبل سائفر کیس میں بھی گرفتار ہیں اور ان کا جیل ٹرائل چل رہا ہے، چیئرمین پی ٹی آئی پر فرد جرم بھی عائد کی جا چکی ہے۔
