نگراں وزیر اعلیٰ بلوچستان میر علی مردان خان ڈومکی سے پاکستان میں تعینات امریکی سفیر ڈونلڈ بلوم اور قونصل جنرل کانرڈ ٹریبل نے ملاقات کی، اس دوران دونوں رہنماؤں نے تعلیم، سیاحت اور امن کے فروغ سے متعلق امور پر گفتگو کی۔ وزیر اعلیٰ بلوچستان نے عالمی امن کے لیے کی گئی امریکا کی کاوشوں کو سراہا۔
نگراں وزیر اعلیٰ بلوچستان میر علی مردان خان ڈومکی نے امریکی سفیر ڈونلڈ بلوم سے ملاقات کے دوران گفتگو کرتے ہوئے کہا کہ بلوچستان روایتوں کا امین صوبہ ہے، پاکستان اور امریکا کے مابین دیرپا سفارتی اور دفاعی تعلقات استوار ہیں۔
’پاکستان عالمی امن کے لیے کی گئی امریکا کی کاوشوں کو سراہتا ہے۔‘
نگراں وزیر اعلیٰ بلوچستان نے کہا کہ بلوچستان میں امریکی حکومت اور عوام نے تعلیم خصوصاً گرلز ایجوکیشن کے لیے نمایاں تعاون کیا ہے، دہشتگردی، جرائم کی روک تھام اور تفتیش کے عمل کو جدید خطوط پر استوار کرنے کے لیے امریکی معاونت کو سراہتے ہیں۔
مزید پڑھیں
میر علی مردان خان ڈومکی نے کہا کہ بلوچستان پولیس کو گاڑیاں، جدید آلات اور ساز و سامان فراہم کیا گیا ہے، پولیس کی پیشہ ورانہ صلاحیتوں اور مہارتوں میں اضافے کا یہ منصوبہ امن کی بحالی اور عوام کے تحفظ کے لیے اہمیت کا حامل ہے۔
’بلوچستان سرمایہ کاری کے لیے موزوں خطہ ہے۔‘
وزیر اعلیٰ نے کہا کہ بلوچستان کی خواتین کو با اختیار بنانے کے لیے کاروباری مواقعوں کی فراہمی کے امریکی منصوبے کو بھی سراہتے ہیں، بلوچستان میں امن، تعلیم، خواتین کی معاشی ترقی اور مواصلات سمیت دیگر شعبوں میں جاری امریکی معاونت کے منصوبے اہمیت کے حامل ہیں۔
’امریکی سرمایہ کاری سے دوطرفہ تعلقات کو فروغ ملے گا، دونوں ممالک کے مابین تجارت کے حجم کو بڑھانا چاہیے۔‘
امریکی سفیر ڈونلڈ آرمن بلوم نے کہا کہ بلوچستان اور خیبر پختونخوا میں امن و فراہمی انصاف کے منصوبوں پر کام کررہے ہیں، اس سلسلے میں وفاقی اور صوبائی دونوں حکومتوں سے مل کر بات کام کررہے ہیں۔
ڈونلڈ بلوم نے کہا کہ امریکا اور عالمی اداروں نے سندھ اور بلوچستان میں گزشتہ سال کے تباہ کن سیلاب کے متاثرین کی کھل کر مدد کی ہے۔ بلوچستان میں سیاحت کے فروغ اور قدیم تہذیب کو محفوظ بنانے کے لیے بھی معاونت کریں گے۔
ملاقات کے اختتام پر نگراں وزیر اعلیٰ بلوچستان میر علی مردان خان ڈومکی اور امریکی سفیر و قونصل جنرل کے مابین سوئینر اور تحائف کا بھی تبادلہ ہوا۔
