قومی کرکٹ ٹیم کے اسپینر آل راؤنڈر عماد وسیم نے انٹر نیشنل کرکٹ سے ریٹائرمنٹ کا اعلان کر دیا۔
سوشل میڈیا پلٹ فارم انسٹاگرام پر عماد وسیم نے انٹرنیشنل کرکٹ سے ریٹائرمنٹ کا اعلان کرتے ہوئے لکھا کہ حالیہ دنوں میں اپنے بین الاقوامی کرکٹ کیریئر کے بارے میں کافی سوچ رہا ہوں اور میں اس نتیجے پر پہنچا ہوں کہ اب میرے لیے بین الاقوامی کرکٹ سے ریٹائرمنٹ کا اعلان کرنے کا صحیح وقت ہے۔
ان کا مزید کہنا ہے میں گزشتہ برسوں میں پی سی بی کے تعاون کے لیے ان کا شکریہ ادا کرنا چاہتا ہوں- پاکستان کی نمائندگی کرنا واقعی ایک اعزاز کی بات ہے۔ ون ڈے اور ٹی 20 فارمیٹس میں میچز میں پاکستان کی نمائندگی ایک خواب تھا جو سچ ثابت ہوا۔
انہوں نے کہا کہ پاکستان کرکٹ کے لیے یہ ایک زبردست وقت ہے پاکستان ٹیم نئے کوچز اور قیادت کی آمد کے ساتھ آگے بڑھ رہی ہے۔ میں ہر ایک کی کامیابی کے لیے دعاگو ہوں اور میں ٹیم کی شاندار کارکردگی کو دیکھنے کا منتظر ہوں۔
ان کا کہنا تھا کہ پاکستانی شائقین کا شکریہ کہ انہوں نے ہمیشہ جذبے اور خلوص کے ساتھ میرا ساتھ دیا۔ میں خاندان اور دوستوں کا شکریہ گزار ہوں۔
انہوں نے کہا کہ اب میں بین الاقوامی اسٹیج سے ہٹ کر اپنے کیریئر کے اگلے مرحلے پر توجہ کروں گا۔
پاکستان کرکٹ بورڈ نے سوشل میڈیا پلٹ فارم ایکس پرعماد وسیم کو پاکستان اور پاکستان کرکٹ ٹیم کے لیے ان کی خدمات پر شکریہ ادا کیا۔
Thank you for all your performances and contributions to Pakistan cricket 💫
Read more: https://t.co/ZvKOmLwbSG pic.twitter.com/AVBI5psbpA
— Pakistan Cricket (@TheRealPCB) November 24, 2023