سابق وزیراعظم عمران خان کی جانب سے چیف جسٹس قاضی فائز عیسٰی کو لکھے خط پر سپریم کورٹ کی جانب سے رد عمل میں کہا گیا ہے کہ چیف جسٹس قاضی فائز عیسٰی کو نہ کسی دباؤ میں لایا جا سکتا ہے نہ وہ کسی کی حمایت کرینگے۔
سپریم کورٹ کی جانب سے جاری کردہ ایک اعلامیہ میں کہا گیا ہے کہ یکم دسمبر کو سات صفحات پر مشتمل درخواست بمعہ 77 صفحات پر مشتمل دستاویز بظاہر ایک سیاسی جماعت کی جانب سے موصول ہوئی، دستاویز مرتب کرنیوالے وکیل کا نام اور رابطہ کی تفصیلات نہیں دی گئی، تاہم لفافے کے مطابق دستاویز انتظار حسین پنجوتھا نے کوریئر کی تھیں۔
اعلامیہ میں حیرانی کا اظہار کرتے ہوئے کہا گیا ہے کہ سربمہر لفافہ موصول ہونے سے پہلے ہی دستاویز کس طرح میڈیا کو جاری کی گئیں، اس جماعت کی اچھی نمائندگی وکلاء کرتے رہے ہیں، پچھلوں دنوں سپریم کورٹ میں اس جماعت کے وکلاء فوجی عدالتوں اور انتخابات سے متعلق کیس کو تکمیل تک لے گئے۔
اعلامیہ میں کہا گیا ہے کہ چیف جسٹس پاکستان قاضی فائز عیسٰی کو اپنی آئینی ذمہ داریوں کا ادراک ہے اور انہیں نہ کسی دباؤ میں لایا جا سکتا ہے نہ وہ کسی کی حمایت کریں گے، چیف جسٹس فائز عیسٰی اللہ کے فضل سے اوراپنے حلف کے مطابق فرائض سرانجام دیتے رہیں گے۔
