ڈسٹرکٹ اینڈ سیشن کورٹ راولپنڈی نے پی ٹی آئی کے رہنما ماجد ستی قتل کیس کا فیصلہ سناتے ہوئے فرخ کھوکھر سمیت 3 ملزمان کو عمر قید اور دس، دس لاکھ روپے جرمانے کی سزا سنائی ہے۔
ایڈیشنل سیشن جج افشاں اعجاز صوفی نے مقدمے کی سماعت کے بعد فیصلہ سنایا، جس کے مطابق ایک ملزم کو بری بھی کیا گیا ہے۔
یہ بھی پڑھیں: اسلام آباد: جے یو آئی رہنما فرخ کھوکھر کی گرفتای و رہائی
عدالت نے ملزم فرخ کھوکھر، حیدر علی اور امیر حمزہ کو قتل کا جرم ثابت ہونے پر عمر قید اور فی کس 10 لاکھ روپے جرمانے کی سزا کا حکم دیا، جبکہ مقدمے میں نامزد ملزم وسیم کو شک کا فائدہ دیتے ہوئے بری کر دیا۔
فیصلہ سنائے جانے سے قبل پولیس نے عدالتی حکم پر ملزم فرخ کھوکھر کو صبح ہی اپنی تحویل میں لے لیا تھا۔
مزید پڑھیں: کیا جے یو آئی فرخ کھوکھر کو سینیٹ کا ٹکٹ دینے جارہی ہے؟ کامران مرتضیٰ نے بتادیا
ماجد ستی کو 23 اگست 2022 کو راولپنڈی کے علاقے سکستھ روڈ پر فائرنگ کرکے قتل کیا گیا تھا، جس کا مقدمہ تھانہ صادق آباد میں درج کیا گیا تھا۔
فیصلے کے موقع پر کسی بھی ناخوشگوار صورتحال سے نمٹنے کے لیے احاطہ عدالت میں سخت سیکیورٹی انتظامات کیے گئے تھے اور پولیس کی بھاری نفری تعینات رہی۔
