الیکشن کمشن آف پاکستان نے اعلان کیا ہے کہ عام انتخابات 2024 کا شیڈول جمعہ 15 دسمبر کو جاری کردیا جائے گا۔
ایک نجی ٹی وی چینل سے گفتگو کرتے ہوئے سیکریٹری الیکشن کمیشن عمر حمید نے سپریم کورٹ کے حکم پر عمل درآمد کرنے کا اعلان کرتے ہوئے بتایا کہ انتخابی شیڈول جمعے کو جاری ہوجائے گا۔ عمر حمید نے کہا کہ عدالت عظمیٰ کا حکم ہے لہٰذا اس پر لازماً عمل ہوگا۔
جب سیکریٹری الیکشن کمیشن سے استفسار کیا گیا کہ کیا عام انتخابات 8 فروری 2024 کو ہوجائیں گے تو اس پر انہوں نے کہا کہ ’جس طرح سپریم کورٹ نے ہدایات دی ہیں، ویسا ہی ہوگا‘۔
واضح رہے کہ سپریم کورٹ نے بیوروکریسی سے لیے جانے والے ریٹرننگ افسران والے معاملے پر لاہور ہائیکورٹ کا فیصلہ معطل کرتے الیکشن کمیشن کو آج ہی انتخابی شیڈول جاری کرنے کا حکم دیا تھا۔ عدالت عظمیٰ نے لاہور ہائیکورٹ میں دائر درخواست بھی ناقابل سماعت قرار دے دی ہے۔
