وائٹ ہاؤس نے اعلان کیا ہے کہ امریکی صدر جوبائیڈن کینسر کے مرض سے صحت یاب ہوگئے ہیں۔
بی بی سی کی رپورٹ کے مطابق امریکی صدر جوبائیڈن میں گزشتہ ماہ جلد کے کینسر کے زخم کی تشخیص ہوئی تھی جو معمولی علاج کے بعد مندمل ہوگیا ہے۔
دریں اثنا رپورٹ میں جوبائیڈن کے معالج کا حوالہ دیتے ہوئے بتایا گیا ہے کہ صدر اب صحت یاب ہیں اور انہیں مزید علاج کی ضرورت نہیں تاہم ان کی طبی نگرانی جاری رکھی جائے گی۔
80 سالہ امریکی صدر کا رواں سال فروری میں جسمانی معائنہ ہوا تھا جس کے بعد ان کی صحت کو فرائض کی ادائیگی کے لیے موزوں قرار دیے دیا گیا تھا۔
صدر جوبائیڈن کے معالج کیون اوکونر کے ایک نوٹ کے مطابق صدر جوبائیڈن کے سینے میں ایک زخم تھا جسے 16 فروری کو علاج کے بعد ٹھیک کر دیا گیا تھا۔
ڈاکٹر کیون اوکونر کا کہنا ہے کہ امریکی صدر مکمل صحت یاب ہو چکے ہیں اور اب انہیں مزید علاج کی ضرورت نہیں ہے۔
سینٹر فار ڈیسیز کنٹرول (سی ڈی سی) کے مطابق امریکی صدر جس زخم کا شکار ہوئے وہ کینسر کی عام شکل ہے۔
امراض جلد مرکز کے مطابق ہر سال 36 لاکھ امریکی افراد میں اس مرض کی تشخیص ہوتی ہے۔ کینسر کی دوسری اقسام کے مقابلہ میں یہ قسم زیادہ کثرت سے پھیلتی ہے لیکن یہ قابل علاج ہے اور اگر ابتدائی مرحلے میں ہی اس کا سدباب کر لیا جائے تو اس سے نقصان کم سے کم پہنچتا ہے۔
صدر جوبائیڈن ماضی میں بھی کئی مرتبہ اسی جلدی کینسر سے متاثر ہوچکے ہیں تاہم ان کا کامیاب علاج کرلیا گیا تھا۔
جلد کے کینسر سے بچنے کے لیے معالجین کا کہنا ہے کہ سردیوں میں گرم رہنے کے لیے زیادہ کپڑوں اور سن اسکرین والے لوشن کو استعمال کیا جانا چاہیے۔
یاد رہے کہ امریکی صدر کا جواں سالہ بیٹا اور بہو دونوں ہی دماغ کے کینسر میں مبتلا ہوکر جان کی بازی ہار چکے ہے۔
