پاکستان سپرلیگ سیزن 8 کے 20ویں میچ میں لاہور قلندرز نے ملتان سلطانز کو21رنز سے شکست دے کرایک اور جیت اپنے نام کرتے ہوئے اپنی ٹاپ پوزیشن مزید مستحکم کرلی۔
لاہور قلندرز کے کپتان شاہین شاہ آفریدی نے ٹاس جیت کر پہلے بیٹنگ کافیصلہ کیا اور 9 وکٹوں کے نقصان پر 180 رنز بنائے جس کے جواب میں ملتان سلطانز مقررہ 20 اوورز میں 7وکٹوں کے نقصان پر159رنزپرڈھیرہوگئی۔ کیرن پولارڈ 39 اور محمد رضوان 30 رنز بنا سکے۔
لاہور قلندرز کے اوپنرفخر زمان کھیل کے آغاز میں ہی بغیر کوئی رن بنائے آؤٹ ہوگئے تھے تاہم وکٹ کیپر بیٹر سیم بلنگز نے شاندار کھیل کا مظاہرہ کرتے ہوئے 35 گیندوں پر 2 چھکوں اور 6 چوکوں کی مدد سے 54 رنز بنائے جبکہ عبداللہ شفیق 48 رنز بنا کر آؤٹ ہوئے۔
لاہور قلندرز کے دیگر کھلاڑیوں میں مرزا طاہر بیگ نے 17، ڈیوڈ ویسے نے 15، سکندر رضا نے 14 جبکہ حسین طلعت اور شاہین شاہ آفریدی نے 9، 9 رنز کی اننگز کھیلی۔
ملتان سلطانز کے باؤلرز کی جانب سے کیرن پولارڈ، عباس آفریدی، احسان اللہ اور انور علی نے دو دو کھلاڑیوں کو آؤٹ کیا جبکہ سمین گل ایک وکٹ حاصل کرنے میں کامیاب رہے۔
واضح رہے کہ پوائنٹس ٹیبل پر اس وقت لاہور قلندرز سب سے ٹاپ پر اور ملتان سلطانز کی ٹیم دوسرے نمبرپرموجود ہے۔
