ملک بھر میں مون سون بارشوں کا سلسلہ جاری ہے، جبکہ گزشتہ 24 گھنٹوں کے دوران بارشوں سے متعلق مختلف حادثات میں مزید 11 افراد جاں بحق اور 25 زخمی ہوگئے ہیں۔
دوسری جانب محکمہ موسمیات نے سندھ کے مختلف اضلاع میں آئندہ دو روز کے دوران مزید بارشوں کی پیشگوئی کرتے ہوئے شہریوں کو احتیاط برتنے کی ہدایت کی ہے۔
قومی آفات سے نمٹنے کے ادارے (این ڈی ایم اے) کی ہفتہ وار صورتحال رپورٹ کے مطابق گزشتہ 24 گھنٹوں کے دوران پنجاب میں 7، سندھ میں 2، خیبر پختونخوا اور گلگت بلتستان میں ایک، ایک شخص جان کی بازی ہار گیا۔
یہ بھی پڑھیں: ملک بھر میں شدید بارشوں کی پیشگوئی، پی ڈی ایم اے اور محکمہ موسمیات کا سیلابی انتباہ
ان حادثات میں 25 افراد زخمی بھی ہوئے، جن میں پنجاب کے 20، خیبر پختونخوا کے 3 اور سندھ کے 2 افراد شامل ہیں۔
رپورٹ کے مطابق 26 جون سے شروع ہونے والے مون سون سیزن کے دوران اب تک ہلاکتوں کی مجموعی تعداد 97 جبکہ زخمیوں کی تعداد 297 ہو چکی ہے۔
اسی عرصے میں 447 مکانات کو نقصان پہنچا ہے جبکہ 269 مویشی ہلاک ہوئے ہیں۔
Pakistan braces for the southwest monsoon as heavy rains threaten flash floods, landslides and overflowing rivers.
Al Jazeera’s Kamal Hyder reports from Lahore. pic.twitter.com/Jy3AsvS8Bp
— Al Jazeera English (@AJEnglish) July 25, 2026
این ڈی ایم اے نے شہریوں پر زور دیا ہے کہ وہ مون سون بارشوں کے دوران احتیاطی تدابیر اختیار کریں اور متعلقہ اداروں کی جانب سے جاری کردہ ہدایات پر عمل کریں۔
ادھر محکمہ موسمیات کے مطابق جنوب مغربی راجستھان اور اس سے ملحقہ علاقوں میں ہوا کا کم دباؤ موجود ہے، تاہم اس کی شدت میں بتدریج کمی آنے کا امکان ہے۔
اس کے باوجود طاقتور مون سون ہوائیں ملک کے جنوبی اور وسطی علاقوں میں داخل ہو رہی ہیں، جس کے باعث سندھ کے مختلف اضلاع میں آج اور کل وقفے وقفے سے بارشوں کا امکان ہے۔
Rain-wind/thundershowers is expected in northeastern/southeastern Sindh, eastern/southern Punjab, upper Khyber Pakhtunkhwa, Gilgit-Baltistan, Kashmir and northeastern/southern Balochistan. Heavy rainfall is likely at isolated places at southeastern Sindh and southern Punjab. pic.twitter.com/R34hB6Of1R
— Pak Met Department محکمہ موسمیات (@pmdgov) July 26, 2026
محکمہ موسمیات نے تھرپارکر، عمرکوٹ، میرپورخاص، ٹنڈو محمد خان، ٹنڈو الہ یار، حیدرآباد، سانگھڑ، شہید بینظیر آباد، کشمور، جیکب آباد، شکارپور، سکھر، خیرپور اور نوشہرو فیروز میں گرج چمک کے ساتھ بارش کی پیشگوئی کی ہے، جبکہ بعض علاقوں میں موسلا دھار بارش بھی ہو سکتی ہے۔
کراچی کے بارے میں محکمہ موسمیات کا کہنا ہے کہ آئندہ 3 روز تک مطلع ابر آلود اور موسم مرطوب رہے گا، شہر میں آج ہلکی بارش یا بوندا باندی کا امکان ہے۔
مزید پڑھیں: آئندہ 24 گھنٹوں کے دوران موسم کیسا رہے گا؟ محکمہ موسمیات نے پیش گوئی کردی
جبکہ پیر اور منگل کو وقفے وقفے سے تیز ہوائیں چلنے اور مضافاتی علاقوں میں گرج چمک کے ساتھ بارش ہونے کی توقع ہے۔
ماہرین نے خبردار کیا ہے کہ شدید بارشوں کے باعث نشیبی علاقوں میں پانی جمع ہونے، شہری سیلاب اور ندی نالوں میں طغیانی کا خطرہ پیدا ہو سکتا ہے۔
