پاکستان تحریک انصاف (پی ٹی آئی) کے صدر اور سابق وزیر اعلیٰ پنجاب پرویز الٰہی کو دل کی تکلیف کے باعث جیل سے اسپتال منتقل کر دیا گیا۔ پرویز الٰہی کو راولپنڈی انسٹی ٹیوٹ آف کارڈیالوجی منتقل کیا گیا۔
جیل ذرائع کے مطابق پرویزالٰہی کو دل میں تکلیف پر راولپنڈی انسٹی ٹیوٹ آف کارڈیالوجی (آر آئی سی) منتقل کیا گیا ہے۔ چوہدری پرویز الٰہی کوگزشتہ رات سے دل میں تکلیف کی شکایت تھی اور ان کا جیل اسپتال میں بھی طبی معائنہ کیا گیا۔
مزید پڑھیں
جیل ذرائع کا کہنا ہے کہ پرویز الٰہی کو سینے میں انفیکشن بھی ہوا ہے، ان کے اسپتال میں ضروری ٹیسٹ کیے جارہے ہیں۔
واضح رہے 2 روز قبل انسداد دہشتگردی عدالت اسلام آباد کے احاطے میں گفتگو کرتے ہوئے سابق وزیر اعلیٰ پنجاب پرویز الٰہی نے کہا تھا کہ اس وقت قانون کی حالت یہ ہے کہ مجھے 3 بار دل کی تکلیف ہوئی ہے لیکن مجھے اسپتال نہیں جانے دیا گیا۔
انہوں نے کہا کہ الیکشن لڑ رہا ہوں 3 جگہوں سے ایم پی اے 3 قومی اسمبلی کے حلقوں سے انتحابات میں حصہ لوں گا۔ لیول پلیئنگ فیلڈ سے متعلق سوال کے جواب میں انہوں نے کہا تھا کہ فیلڈ ہی نہیں لیول کیا کرنا ہے، ملک میں جنگل کا قانون ہے۔
ان کا کہنا تھا کہ نواز شریف اور شہباز شریف نے مل کر جو کیا ہےعوام کبھی نہیں بھولے گی، معیشت اور غریبوں کی حالت آپ کے سامنے ہی ہے۔
