حکومت فوج اور فورسز کے خلاف پروپیگنڈا کرنے والوں کو سزا دے، سینیٹ میں قرارداد منظور

پاکستان کے ایوان بالا سینیٹ نے پاک فوج اور سیکیورٹی فورسز کے حوالے سے منفی پروپیگنڈا دینے والوں کو سخت سزا دینے کی قرارداد منظور کر لی ہے۔

پیپلزپارٹی کے سینیٹر بہرمند تنگی نے قرار داد ایوان میں پیش کی جسے اتفاق رائے سے منظور کر لیا گیا۔

قرارداد کے متن میں کہا گیا ہے کہ جو لوگ پاک فوج اور سیکیورٹی فورسز کے خلاف منفی پروپیگنڈا کر رہے ہیں ان کو سخت سزا دی جائے۔

قرارداد میں کہا گیا ہے کہ ہمیں دہشتگردی کے خلاف جنگ میں فوج اور سیکیورٹی فورسز کی قربانیوں کا ادراک ہے، دشمن ہمسائیوں کی موجودگی میں ضروری ہے کہ ہماری فوج اور سیکیورٹی ایجنسیاں مضبوط ہوں۔

قرارداد کے مطابق پاک فوج کے خلاف سوشل میڈیا کے پلیٹ فارم پر منفی پروپیگنڈا کیا جا رہا ہے۔

قرارداد میں مطالبہ کیا گیا ہے کہ فوج کے خلاف منفی پروپیگنڈے میں ملوث عناصر کو حکومت سخت سے سخت سزا دے۔

پیپلزپارٹی کے سینیٹر کی جانب سے پیش کی گئی قرارداد کو کثرت رائے سے منظور کیا گیا جبکہ پی ٹی آئی کے ارکان سینیٹ نے بھی حمایت میں ووٹ دیے۔