ٹیکنالوجی کی دنیا میں جہاں آئے روز ترقی ہو رہی ہے وہیں پاکستان بھی اب کسی سے پیچھے نہیں۔
ملک بھر میں فری لانسنگ کے ذریعے رقم کمانے والوں کو اب رقم منگوانے کے لیے کسی پریشانی کا سامنا نہیں کرنا پڑے گا۔
حکومت پاکستان اور عالمی سطح پر آن لائن ادائیگیوں کے نظام کو چلانے والی کمپنی ’پے پال‘ کے درمیان معاہدہ ہو گیا ہے۔
مزید پڑھیں
میڈیا رپورٹس کے مطابق معاہدے کے تحت ملک میں ترسیلات زر کو ممکن بنانے کے لیے تیسرے فریق کے ذریعے پے پال سے چینلائز کیا جائے گا۔
آن لائن ادائیگیوں کا نظام چلانے والی کمپنی ’پے پال‘ دنیا بھر کی 190 مارکیٹس میں فعال ہے۔
واضح رہے کہ آن لائن کاروبار سے منسلک فری لانسرز کا یہ دیرینہ مطالبہ تھا کہ ’پے پال‘ کو پاکستان میں لایا جائے تاکہ رقم نکلوانے کے لیے پیش آنے والی دشواری کا حل نکل سکے۔
فری لانسرز کا دیرینہ مسئلہ حل کر دیا، وفاقی وزیر آئی ٹی
اِدھر نگراں وفاقی وزیر آئی ٹی عمر سیف نے بھی خوشخبری سنا دی ہے کہ حکومت نے فری لانسرز کا دیرینہ مسئلہ حل کر دیا ہے۔ اب وہ ’پے پال‘ کے ذریعے اپنی رقم منگوا سکیں گے۔
ڈاکٹر عمر سیف کے مطابق وزرات آئی ٹی آئندہ ہفتے سے پے پال کے ذریعے ترسیلات زر کو چینلائز کرنے کے ساتھ ساتھ دیگر ڈیجیٹل اقدامات کے لیے تیار ہے۔