ملک بھر میں کڑاکے کی سردی، بالائی علاقوں میں ٹھنڈی ہواؤں کا راج، مری اور گلیات مزید سرد ہوگئے۔ کشمیر میں مطلع ابر آلود۔ بلوچستان میں ہلکی بارش اور پہاڑوں پر برفباری کا امکان۔ پنجاب، بالائی سندھ اور خیبر پختونخوا کے میدانی علاقوں میں دھند کے ڈیرے۔ سکردو کا درجہ حرارت منفی 10 تک گر گیا۔ محکمہ موسمیات نے مزید سرد موسم کی پیشگوئی کی ہے۔
منگل یا بدھ کو مری اور گلیات میں برفباری کا امکان
ملک بھر میں سردی کی شدید لہر جاری ہے، کشمیر اور گلگت بلتستان سمیت شمالی علاقوں میں ٹھنڈ کا راج ہے۔ مری، گلیات اور گرد و نواح میں موسم شدید سرد اور مطلع جزوی ابرآلود ہے جبکہ منگل یا بدھ کو برفباری کا امکان بھی ہے۔ پنجاب، بالائی سندھ اور خیبر پختونخواکے میدانی علاقوں میں شدید دھند چھائی ہوئی ہے۔ دھند سے سردی کی شدت بڑھ گئی ہے۔
مزید پڑھیں
محکمہ موسمیات کا کہنا ہے کہ بلوچستان میں مطلع ابر آلود اور کہیں کہیں بارش اور پہاڑوں پر برفباری کا امکان ہے۔ ملک کے بالائی علاقوں میں ٹھنڈی ہوائیں چلنے سے درجہ حرارت میں مزید کمی کا امکان ہے۔ اسکردو منفی 10، گلگت، استور میں منفی 05، کالام منفی 4 اور ہنزہ میں منفی 03 ڈگری سینٹی گریڈ تک درجہ حرارت گر چکا ہے۔
سیاحوں کی بڑی تعداد میں آمد، ناخوشگوار واقعے کی روک تھام کے لیے تندہی سے کام کر رہے ہیں: پی ڈی ایم اے
موسم کی پہلی برفباری کے پیش نظر صوبائی ڈیزاسٹر مینجمنٹ اتھارٹی (پی ڈی ایم اے) نے مری اور گردونواح کے علاقوں کے لیے پیشگوئی جاری کردی ہے جس کے مطابق برفباری کا آغاز منگل سے ہونے کا امکان ہے۔
پی ڈی ایم اے کے ترجمان نے بتایا کہ حکام برفباری کے دوران سیاحوں کی بڑی تعداد میں آمد کے پیش نظر کسی بھی ناخوشگوار واقعے کی روک تھام کے لیے تندہی سے کام کر رہے ہیں۔ سیاحوں کے لیے 3 سہولت مراکز قائم کیے گئے تھے جن کی تعداد بڑھا کر 13 کر دی گئی ہے۔
