ایف آئی اے کمرشل بینکنگ سرکل کراچی نے ایک اور کارروائی میں غیر قانونی کرنسی ایکسچینج میں ملوث گینگ کے 2 ملزمان گرفتار کرتے ہوئے ان کی قبضے سے کروڑوں مالیت کی غیر ملکی کرنسی بھی برآمد کر لی ہے۔
ترجمان ایف آئی اے کے مطابق ڈائریکٹر ایف آئی اے کراچی زون زعیم اقبال شیخ کی ہدایت پر حوالہ ہنڈی اور غیر قانونی کرنسی ایکسچینج میں ملوث عناصر کے خلاف جاری کریک ڈاون میں ڈپٹی ڈائریکٹر کمرشل بینکنگ سرکل کراچی علی مراد کی زیر نگرانی چھاپہ مار کارروائی کی گئی ہے۔
مزید پڑھیں
کراچی کے علاقے کلفٹن میں غیر قانونی کرنسی ایکسچینج میں ملوث گینگ کے 2 ملزمان محمد باقیر اور محمد فاروق کو گرفتار کرکے ان کے قبضے سے 45000 امریکی ڈالرز بھی برآمد کرلیے ہیں، ملزمان سے ہنڈی حوالہ سے متعلق ریکارڈ بھی برآمد کیا گیا ہے، ملزمان برآمد ہونے والی کرنسی کے حوالے سے حکام کو مطمئن نہ کر سکے۔
ترجمان ایف آئی اے کے مطابق گرفتار ملزمان حوالہ ہنڈی اور کرنسی کی غیر قانونی ایکسچینج سمیت بغیر لائسنس غیر ملکی کرنسی ایکسچینج میں بھی ملوث پائے گئے، ملزمان کو گرفتار کر کے تفتیش کا آغاز کر دیا گیا ہے اور دیگر ملزمان کی گرفتاری کے لیے چھاپے مارے جا رہے ہیں۔
