ہر بچہ معیاری تعلیم کا مستحق ہے جو امن و ترقی کے لیے بھی ضروری ہے، برطانوی ہائی کمشنر

پاکستان میں برطانوی ہائی کمشنر جین میریٹ نے کہا ہے کہ معیاری تعلیم امن، ترقی اور غربت کو ختم کرنے کے لیے بہت ضروری ہے اور ہر بچہ اچھی تعلیم کا مستحق ہے۔

ان خیالات کا اظہار انہوں نے بدھ کو تعلیم کے عالمی دن کے موقع پر اپنے پیغام میں کیا۔ انہوں نے کہا کہ جامع معیاری تعلیم امن، ترقی اور غربت کو ختم کرنے کے لیے بہت ضروری ہے، لڑکیوں اور لڑکوں دونوں کو تعلیم حاصل کرنے کا مساوی حق حاصل ہے تاکہ وہ اپنے خوابوں کو پورا کر سکیں۔

انہوں نے کہا کہ پاکستان میں تقریباً 2 کروڑ 60 لاکھ بچے اسکولوں سے باہر ہیں اور اس کے ساتھ اسکول جانے والے بچوں کے سیکھنے کے معیار میں بھی کمی ہے۔

انہوں نے کہا کہ سنہ 2014 سے برطانیہ نے پاکستان بھر میں تعلیم تک رسائی حاصل کرنے کے لیے تقریباً 5 لاکھ 80 ہزار بچوں کی براہ راست مدد کی۔

جین میریٹ نے کہا کہ ’مجھے خوشی ہے کہ حکومت پاکستان کے ساتھ یہ سفر جاری ہے‘۔ انہوں نے مزید کہا کہ ہر بچہ اچھی تعلیم کا مستحق ہے اور تعلیم کے عالمی دن پر ہم اس اہم کام کو انجام دینے کا عہد کرتے ہیں۔