گوگل نے اینڈرائیڈ موبائل فون صارفین کے لیے ایک انتہائی حیران کن اور منفرد فیچر متعارف کروا دیا ہے۔ گوگل نے ویب ورژن کے بعد اب اینڈرائیڈ فونز پر گوگل سرچ میں لینس جیسا ایک فیچر متعارف کرایا ہے، جسے ’سرکل سرچ‘ کا نام دیا گیا ہے۔ صارفین اس نئے فیچر کی مدد سے انٹرنیٹ پر آسانی سے سرچنگ کرسکتے ہیں۔
مزید پڑھیں
اس فیچر کی مدد سے صارفین کسی بھی تصویر کے ایک حصے کو فوکس کرکے یا اس کے گرد دائرہ بنا کر اس کا اصل ورژن یا اس سے ملتی جلتی چیزیں تلاش کرسکتے ہیں۔ یہ فیچر ڈیسک ٹاپ اور ویب صارفین کافی عرصے سے استعمال کر رہے ہیں۔
یہ فیچر فیکٹ چیک یا تحقیق کرنے والے صارفین کے لیے بہت کارآمد ثابت ہو سکتا ہے، کیوں کہ اگر وہ کسی بھی وائرل ہونے والی تصویر کو ہائی لائٹ کرکے سرچ کریں گے تو اس کی پوری تفصیل اور پہلے سے شیئر کردہ تصاویر چند ہی سکینڈز میں سامنے آ جائیں گی۔
’سرکل سرچ‘ کو استعمال کرنے کے لیے صارفین کو انٹرنیٹ کی کسی بھی ویب سائیٹ یا ایپلی کیشن پر نظر آنے والی تصویر پر کلک کرنا ہے، جیسے ہی تصویر پر سرکل بنائیں گے، سرچ کا آپشن نظر آئے گا اور اسکرین خود بخود گوگل سرچ پر چلی جائے گی۔ ’سرکل سرچ‘ کو دنیا بھر میں 31 جنوری کو نئے اور جدید اسمارٹ فونز میں لانچ کیا جائے گا۔
