نگراں وزیراعظم انوارالحق کاکڑ نے ملک میں کامیاب انتخابات کے انعقاد اور اطمینان بخش ٹرن آؤٹ پر قوم کا شکریہ ادا کرتے ہوئے کہا ہے کہ وہ الیکشن کمیشن آف پاکستان، عبوری صوبائی حکومتوں، مسلح افواج، سول آرمڈ فورسز، پولیس، قانون نافذ کرنے والے اداروں، انتخابی عملے، میڈیا اور ان تمام اداروں اور افراد کی کاوشوں کو سراہتا ہوں جنہوں نے آزادانہ اور منصفانہ انتخابات کے انعقاد میں کردار ادا کیا۔
سماجی رابطے کی ویب سائٹ ’ایکس‘ پر جاری کیے گئے اپنے پیغام میں انوارالحق کاکر نے کہا کہ یہ اہم موقع نہ صرف ہمارے جمہوری عمل کی لچک اور طاقت کا بلکہ پاکستانی عوام کے ناقابل تسخیر جذبے کا بھی ثبوت۔
مزید پڑھیں
وزیراعظم نے کہا کہ پاکستان کے عوام کی شرکت اور جوش و خروش اس جمہوری عمل کا بنیادی جزو رہا ہے۔ انہوں نے مزید کہا کہ ووٹروں کا زیادہ ٹرن آؤٹ ہمارے ملک کے مستقبل کی تشکیل کے لیے عوامی عزم کا واضح اشارہ ہے۔
I deeply thank and congratulate the nation on successful conduct of General Elections-2024.
I appreciate the efforts of Election Commission of Pakistan, Interim Provincial Governments, Armed Forces, Civil Armed Forces, Police, law enforcement agencies, election staff, media and…— Anwaar ul Haq Kakar (@anwaar_kakar) February 8, 2024
انوارالحق کاکڑ نے امید ظاہر کی کہ ووٹوں کے ذریعے ظاہر ہونے والی آوازیں ہماری جمہوریت کی مضبوطی میں کردار ادا کریں گی اور اس کے لیے پاکستانی عوام بجا طور پر مستحق ہیں۔
ان کا کہنا تھا کہ خیبرپختونخوا اور بلوچستان میں دہشت گردی کے چند واقعات کے باوجود ملک بھر میں آزادانہ اور منصفانہ انتخابات کے انعقاد کے لیے مسلح افواج، سول آرمڈ فورسز، ایل ای اے، سویلین ایڈمنسٹریشن اور الیکشن کمیشن آف پاکستان کی کاوشیں قابل تعریف ہیں۔ ان کا مزید کہنا تھا کہ اپنے فرائض سے ان کی غیر متزلزل وابستگی انتخابات کے پرامن انعقاد میں اہم کردار ادا کرتی رہی ہے۔
وزیراعظم نے کہا کہ مشکلات کا سامنا کرتے ہوئے پاکستانی عوام نے غیر معمولی ہمت اور عزم کا مظاہرہ کیا ہے۔ انہوں نے مزید کہا کہ ’دہشت گردی کے حالیہ واقعات کے بعد آپ کا عزم، انتخابی عمل میں شرکت جاری رکھنا، ان قوتوں کے خلاف ایک طاقتور بیان ہے جو ہماری قوم کو عدم استحکام سے دوچار کرنا چاہتی ہیں، یہ امن، استحکام اور خوشحالی کے لیے ہماری اجتماعی خواہش کو واضح کرتا ہے‘۔
انوارالحق کاکڑ نے ایک بار پھر میں اس تاریخی کامیابی پر قوم کو مبارکباد دیتے ہوئے دعا کی کہ یہ الیکشن پاکستان کے روشن اور خوشحال مستقبل کی نوید ثابت ہوں۔
