پاکستان تحریک انصاف کے آزاد امیدوار اب تک کے سرکاری نتائج کے مطابق سب سیاسی جماعتوں سے آگے ہیں تاہم سابق وزیراعظم نوازشریف نے تمام جماعتوں اور آزاد امیدواروں کو دعوت دیتے ہوئے مل کر حکومت بنانے کا اعلان کیا ہے۔
پاکستان تحریک انصاف اس وقت کیا سوچ رہی ہے؟
تحریک انصاف کی اس وقت قومی اسمبلی میں سرکاری نتائج کے مطابق 99 نشستیں ہیں تاہم پی ٹی آئی کا دعویٰ ہے کہ فارم 45 کے مطابق قومی اسمبلی کے 180 نشستوں پر ان کے امیدوار انتخابات جیتنے میں کامیاب ہوچکے ہیں۔
مزید پڑھیں
پاکستان تحریک انصاف اس وقت سابق وزیراعظم عمران خان کی جانب سے آئندہ سیاسی حکمت عملی سے متعلق ہدایات کا انتظار کر رہی ہے۔ اس سلسلے میں سابق وزیراعظم عمران خان سے ملاقات کے لیے بیرسٹر سلمان صفدر، سینیٹر علی ظفر و دیگر وکلا اڈیالہ جیل میں 190 ملین پاؤنڈ نیب ریفرنس کی سماعت کے لیے جائیں گے جہاں عمران خان سے انتخابات کے بعد ان کی پہلی ملاقات متوقع ہے۔
دوسری جانب پاکستان تحریک انصاف کے 90 سے زائد امیدوار جو انتخابات میں کامیاب نہیں ہو سکے وہ فارم 47 عدالت میں چیلنج کریں گے۔ اس کے علاوہ پی ٹی آئی کے آزاد امیدوار مکمل نتائج آنے کے بعد سیاسی جماعت میں شمولیت کا اعلان کریں گے۔ اس حوالے سے تحریک انصاف نے جمعیت علمائے پاکستان یا مجلس وحدت مسلمین میں شمولیت کے لیے مشاورت شروع کردی ہے۔
ذرائع کا کہنا ہے کہ قوی امکان ہے کہ پی ٹی آئی کے آزاد امیدوار مولانا شیرانی کی جمعیت علمائے پاکستان میں شمولیت کا اعلان کریں تاہم علامہ راجا ناصر عباس کی مجلس وحت مسلمین میں بھی شمولیت زیر غور ہے۔
