9 مئی مقدمات : اسپیشل پراسیکیوٹر نے عمران خان کو مرکزی ملزم قرار دے دیا

اسپیشل پراسیکیوٹرز نے بانی پی ٹی آئی عمران خان کو 9 مئی کے  مقدمات میں مرکزی ملزم قرار دے دیا ہے۔

انسدادِ دہشت گردی عدالت لاہور میں بانی پی ٹی آئی عمران خان کے خلاف 9 مئی کے مختلف مقدمات کی سماعت ہوئی، دوران سماعت اسپیشل پراسیکیوٹر رانا شکیل نے بانی پی ٹی آئی کو 9 مئی کے مقدمات کا مرکزی ملزم قرار دیا ہے۔

اسپیشل پراسیکیوٹر رانا شکیل نے اپنے دلائل میں کہا کہ 9 مئی کے واقعات میں بانی پی ٹی آئی مرکزی ملزم ہے، گواہوں کے بیانات موجود ہیں کہ بانی پی ٹی آئی نے پی ٹی آئی تمام رہنماؤں کو فوجی تنصیبات جلانے کا کہا۔

انسداد دہشتگردی عدالت نے استفسار کیا کہ کیا بانی پی ٹی آئی نے عوام کو اداروں کے خلاف حملہ کرنے کا کوئی ٹویٹ کیا؟ جس پر اسپیشل پراسیکیوٹر نے کہا کہ جی ہاں! ٹویٹس اور انسٹاگرام پر بہت سے پیغامات ہیں، بانی پی ٹی آئی نے عوام کو سڑکوں پر نکلنے کا کہا۔

اسپیشل پراسیکیوٹر رانا شکیل نے مختلف گواہوں کے بیانات عدالت کو پڑھ کر بھی سنائے، اسپیشل پراسیکیوٹر رانا شکیل نے پرائم منسٹر ہاؤس جلانے کے کیس میں دلائل مکمل کر لیے ہیں۔

انسداد دہشتگردی عدالت نے 9 مئی کے مقدمات میں جیل سے بانی پی ٹی آئی کی ویڈیو لنک پر حاضری لگوانے کی ہدایت کررکھی ہے ، عدالت نے بانی پی ٹی آئی کے وکلاء سے دلائل بھی طلب کررکھے ہیں۔

یاد رہے کہ بانی پی ٹی عمران خان کے خلاف جناح ہاؤس اور عسکری ٹاور جلاؤ گھیراؤ سمیت 9 مئی کے واقعات کے 7 مقدمات درج ہیں۔