وفاقی وزیر داخلہ و انسداد منشیات محسن نقوی نے کہا ہے کہ ایف آئی اے کو عالمی معیار کا ادارہ بنانے کے لیے کرپشن کے خلاف زیرو ٹالرنس پالیسی ہو گی۔
ایف آئی اے ہیڈکوارٹر کے دورے کے موقع پر گفتگو کرتے ہوئے محسن نقوی نے کہاکہ ایف آئی اے ملکی سلامتی اور سیکیورٹی کا انتہائی اہم ادارہ ہے، اسے اپ گریڈ کر کے بین الاقوامی معیار پر لانا ہوگا، زیر التوا ترقی کے کیسز کو 30 دن کے اندر نمٹایا جائے تاکہ افسران کی حوصلہ افزائی ہو، ادارے کی کارکردگی تب ثابت ہو گی جب بڑی مچھلیوں کو پکڑا جائے گا۔
مزید پڑھیں
وزیر داخلہ محسن نقوی کے ایف آئی اے ہیڈکوارٹر پہنچنے پر ڈی جی ایف آئی اے نے خیر مقدم کیا۔ وفاقی وزیر محسن نقوی نے ایف آئی اے میں تمام زیر التوا پروموشن کیسز کو 30 روز میں نمٹانے کی ہدایت کرتے ہوئے کہا کہ پنجاب میں ہر محکمے میں پروموشنز کیں۔ اسی طرز پر ایف آئی اے میں بھی حقدار ملازمین کو پرموشن دی جائے۔
انہوں نے کہاکہ کرپشن کسی صورت برداشت نہیں کی جائے گی، موثر اقدامات کے ذریعے ملک سے جعلی ادویات کی لعنت کا بھی خاتمہ کرنا ہو گا، ایف آئی اے کو بجلی چوری کی روک تھام میں بھی کردار ادا کرنا ہو گا۔ انسانی اسمگلنگ کا انسداد بھی انتہائی اہم ہے۔
وزیر داخلہ نے یونان کشتی حادثہ پر ہونے والی کارروائی کی رپورٹ طلب کی۔ انہوں نےکہاکہ مختلف ملکوں میں تعینات افسران کی کارکردگی کا بھی جائزہ اور ڈالر کی ملک سے باہر اسمگلنگ کو روکنے کے لیے جامع پلان وضع کیا جائے۔
جعلی دستاویزات پر ملک سے روانگی اور آمد کو روکنے کی ہدایت
انہوں نے کہاکہ ہنڈی حوالہ کا بھی موثر اقدامات سے سدباب کرنا ہو گا، جعلی دستاویزات پر ملک سے روانگی اور آمد کو بھی روکا جائے۔ انٹر پول کے حوالے سے بہتر کام کیا گیا ہے اس میں بھی مزید بہتری لائی جا سکتی ہے۔
وزیر داخلہ نے کہاکہ افسران کی استعداد کار کو بڑھانا اور ٹریننگ کے ذریعے انہیں جدید تقاضوں سے ہم آہنگ کرنا بھی انتہائی ضروری ہے۔ پولیس اسٹیشنوں کی حالت کو بھی بہتر بنانا ہو گا، پبلک سروس ڈلیوری کو بہتر بنانے کے لیے تمام تر وسائل کو بروئے کار لایا جائے۔
وفاقی وزیر داخلہ محسن نقوی نے ایف آئی اے حکام کے اعلیٰ سطح کے اجلاس کی صدارت کی۔ اجلاس میں ادارہ جاتی امور پر بریفنگ دی گئی۔
