پشاور: کوریئر کمپنی سے جعلی ادویات کی بڑی کھیپ پکڑی گئی

ایف آئی اے نے پشاور میں مختلف کارروائیوں میں نجی کوریئر کمپنی کے آفس سے مشتبہ غیر رجسٹرڈ ادویات کی بڑی کھیپ برآمد کرتے ہوئے جعلی ادویات کی فروخت میں ملوث 2 ملزمان کو بھی گرفتار کیا ہے۔

جعلی ادویات کی فروخت میں ملوث عناصر کے خلاف کریک ڈاون کرتے ہوئے ایف آئی اے پشاور زون کے اینٹی کرپشن سرکل نے 8 چھاپہ مار کارروائیوں میں لاکھوں مالیت ادویات کے 50 سے زائد کارٹن برآمد اور 2 ملزمان گرفتار کرتے ہوئے 7 انکوائریاں بھی درج کر لی گئی ہے۔

ایف آئی اے ترجمان کے مطابق رنگ روڈ پشاور میں واقع نجی کوریئر کمپنی کے آفس سے برآمد ہونیوالی مشتبہ غیر رجسٹرڈ ادویات کی بڑی کھیپ میں اینٹی بائیوٹک اور معدے سے متعلق ادویات اور انجیکشن شامل ہیں، ضبط کی گئی تمام مشتبہ ادویات کو ڈریپ حکام کے حوالے کر دیا گیا ہے۔

ایک اور کارروائی میں اینٹی کرپشن سرکل پشاور نے جعلی ادویات کی فروخت میں ملوث 2 ملزمان امتیاز اور محمد علی کو گرفتار کر لیا ہے، جن کیخلا ف اینٹی کرپشن سرکل پشاور میں مقدمہ درج تھا۔

دوسری جانب کمپوزٹ سرکل ایبٹ آباد نے جعلی ادویات میں ملوث عناصر کے خلاف 4 چھاپہ مار کارروائیاں ایبٹ آباد کے علاقے تھاکوٹ میں واقع مختلف میڈیکل اسٹورز میں کی گئی ہیں، جہاں سے بڑی تعداد میں جعلی اور غیر رجسٹرڈ ادویات برآمد کی گئی ہیں۔

ایف آئی اے کمپوزٹ سرکل مردان نے جعلی ادویات میں ملوث عناصر کیخلاف 2 چھاپہ مار کارروائیوں میں بخشالی روڈ اور جنرل چوک تورو میں واقع مختلف میڈیکل اسٹورز سے ملزمان کے قبضے سے بڑی تعداد میں جعلی اور غیر رجسٹرڈ ادویات برآمد کرکے انہیں ڈریپ حکام کے حوالے کر دیا گیا ہے۔

ایف آئی اے حکام نے ملزمان کے خلاف انکوائریاں درج کر لی ہیں جبکہ ڈریپ حکام نے موقع پر جعلی اور غیر رجسٹرڈ ادویات سیل کر کے لیبارٹری بھجوا دی ہیں، ڈریپ حکام کی رپورٹ کی روشنی میں ملزمان کے خلاف نہ صرف مقدمات درج کئے جائیں گے بلکہ گرفتاریاں بھی عمل میں لائی جائے گی۔

ترجمان ایف آئی اے کے مطابق پشاور زون کی جانب سے تمام سرکلز میں خصوصی چھاپہ مار ٹیمیں تشکیل دے دی گئی ہیں اور جعلی اور غیر رجسٹرڈ ادویات کی فروخت میں ملوث عناصر کے خلاف گھیرا تنگ کیا جا رہا ہے،  چھاپہ مار ٹیمیں ڈریپ حکام کے ساتھ مشترکہ کاروائیاں کر رہی ہیں۔