کراچی کے مختلف علاقوں میں بارش اور ژالہ باری سے موسم انتہائی خوشگوار ہو گیا۔ شہر کے مختلف علاقوں میں بادل گرجے برسے تو ماڈل کالونی، بلدیہ ٹاؤن، سرجانی اور ملیر میں تیز بارش اور ژالہ باری بھی ہوئی۔
کراچی کے علاقوں اورنگی ٹاؤن، سرجانی، نیو کراچی، نارتھ کراچی، پورٹ قاسم، گلشن معمار اور اطراف کے علاقوں میں بوندا باندی اور بارش ہوئی۔
موسمیاتی تجزیہ کار کہتے ہیں شہر کے شمال اور شمال مشرق میں بادل بنے ہیں جس سے شہر کے مختلف حصوں میں بوندا باندی اور بارش ہو رہی ہے۔
موسم کا حال بتانے والوں کا کہنا ہے مغربی ہواؤں کا سسٹم آتا ہے تو گرج چمک کے ساتھ بننے والے بادل بہت اونچائی پر ہوتے ہیں۔ اتنی بلندی پر درجہ حرات منفی میں ہوتا ہے۔ جب بارش کے قطرے ان بادلوں سے گزرتے ہیں تو وہ آئس کرسٹل میں ڈھل جاتے ہیں ۔ جنہیں عام طور پر ژالہ باری یا اولے کہا جاتا ہے۔
ماہرین موسم کہتے ہیں کراچی شہر میں مارچ کے وسط میں ژالہ باری بہت غیر معمولی ہے۔ بارش اور ژالہ باری کا سلسلہ 20 مارچ تک وقفے وقفے سے جاری رہے گا۔
محکمہ موسمیات کے مطابق جمعه کے روز اسلام آباد، پنجاب، خیبر پختونخوا، کشمیر، مشرقی بلوچستان اور مشرقی سند ھ میں آندھی، تیز ہواؤں اور گرج چمک کے ساتھ بارش کا امکان ہے۔ اس دوران چند مقامات پر ژالہ باری کی توقع بھی ہے۔
گزشتہ 24 گھنٹے کے دوران اسلام آباد، پنجاب، زیریں خیبرپختونخوا، کشمیر، بلوچستان اور سندھ میں آندھی اور گرج چمک کے ساتھ بارش ہوئی۔ ملک کے دیگر علاقوں میں مطلع جزوی ابر آلود اور موسم خشک رہا۔
