آرمی چیف جنرل سید عاصم منیر سے سعودی معاون وزیر دفاع میجر جنرل طلال بن عبداللہ نے جی ایچ کیو میں ملاقات کی، جس میں باہمی دلچسپی کے امور سمیت دوطرفہ دفاعی تعلقات بشمول دفاعی پیداوار کے شعبہ میں فروغ پر تبادلہ خیال کیا گیا ہے۔
پاک فوج کے شعبہ تعلقاتِ عامہ (آئی ایس پی آر) کے مطابق سعودی معاون وزیر دفاع میجر جنرل طلال بن عبداللہ نے دہشت گردی کے خلاف جنگ میں پاک فوج کی کامیابیوں اور قربانیوں کو سراہتے ہوئے علاقائی امن و استحکام کے لیے گراں قدر خدمات کا اعتراف بھی کیا۔
مزید پڑھیں
سعودی معاون وزیرِ دفاع نے پاک سعودیہ دفاعی تعاون کے 5ویں اجلاس میں بھی شرکت کی۔ جس میں عالمی اور علاقائی سلامتی کو درپیش چیلنجز اور افواج پر ان کے اثرات پر تبادلہ خیال کیا گیا۔ فورم نے جدید ٹیکنالوجی میں تیزی سے ترقی کو دونوں ممالک کے درمیان دفاعی صنعتی تعاون کی ضرورت پر زور دیا۔
آئی ایس پی آر کا کہنا ہے کہ زمینی، فضائی اور سمندری حدود میں مخصوص صلاحیتوں کو نشانہ بنانے کے لیے مرکوز نقطہ نظر کے ساتھ دفاعی تعاون میں کوششوں کو مستحکم کرنے کے عزم کا اعادہ کیا گیا ہے۔ اس حوالے سے فورم کی طرف سے ٹھوس تجاویز پر غور بھی کیا گیا۔ اس موقع پر آرمی چیف نے رائل سعودی لینڈ فورسز کی استعداد کار میں اضافے کے لیے پاک فوج کی مسلسل حمایت کا عزم بھی دہرایا۔
