بجلی بلوں سے چھٹکارے کے لیے سولر پینل لگانے والوں کو ٹیکس بھی دینا پڑے گا، تجویز سامنے آگئی

سینٹرل پاور پرچیزنگ ایجنسی (سی پی پی اے) نے تجویز دی ہے کہ گھریلو یا کمرشل سولر پینل لگانے والوں پر ٹیکس عائد کیا جائے۔

جیو نیوز کے مطابق وزارت توانائی کے ذرائع نے بتایا ہے کہ سی پی پی اے نے سمری وزارت بجلی کو ارسال کردی ہے۔

رپورٹ کے مطابق وزارت توانائی نے بتایا کہ سی پی پی اے نے تجویز دی ہے کہ گھریلو یا کمرشل سولر پینل لگانے والوں سے فی کلو واٹ 2 ہزار روپے ٹیکس وصول کیا جائے۔

وزارت توانائی نے یہ بھی بتایا کہ 12 کلو واٹ کے سولر پینل گرڈ سے 2 ہزار روپے فی کلو واٹ وصول کیے جاسکتے ہیں۔

’جو صارفین 12 کلو واٹ کا سولر پینل لگائیں گے ان سے 24 ہزار روپے وصول کیے جائیں گے‘۔

رپورٹ کے مطابق وزارت توانائی کے ذرائع نے کہا ہے کہ پاور ڈویژن نے سمری کو منظوری کے لیے وزیراعظم آفس بھجوا دیا ہے۔

واضح رہے کہ کچھ سالوں سے بھاری بھر کم بجلی بلوں سے عوام شدید پریشان ہیں، گزشتہ برس گرمیوں میں زیادہ بل آنے کی وجہ سے عوام نے پرتشدد احتجاجی مظاہرے بھی کیے تھے جس کی وجہ سے حکومت کو مشکلات کا سامنا کرنا پڑا تھا۔