وزیراعظم پاکستان میاں محمد شہبازشریف نے ریاض میں ورلڈ اکنامک فورم (ڈبلیو ای ایف) کے خصوصی اجلاس کے موقع پر کویت کے امیر شیخ مشعل الاحمد الجابر الصباح سے ملاقات کی ہے۔
مزید پڑھیں
وزیر اعظم آفس سے جاری بیان کے مطابق اتوار کو امیر شیخ سے ملاقات کے دوران وزیراعظم پاکستان نے اپنے دوبارہ انتخاب پر عزت مآب امیر کویت شیخ مشعل الاحمد الجابر الصباح کے تہنیتی خط پر ان کا شکریہ ادا کیا۔
بیان کے مطابق عزت مآب شیخ مشعل الاحمد الجابر الصباح کو امیر کا عہدہ سنبھالنے پر مبارکباد دیتے ہوئے، وزیر اعظم پاکستان نے ان کے ساتھ مل کر کام کرنے کی خواہش کا اظہار کیا، جس کا مقصد دوطرفہ تعلقات کو باہمی طور پر فائدہ مند اقتصادی شراکت داری میں بدلنا ہےجو کہ دونوں ممالک کے عوام کے بہترین مفاد میں ہو گا۔
واضح رہے کہ پاکستان اور کویت نے نومبر 2023 میں تجارت اور سرمایہ کاری میں تعاون کو مزید گہرا کرنے کے لیے متعدد مفاہمت کی یادداشتوں اور معاہدوں پر دستخط کیے تھے۔
ملاقات میں دوطرفہ تعلقات کے علاوہ علاقائی صورت حال بالخصوص غزہ کے بحران کے حوالے سے بھی تبادلہ خیال کیا گیا۔ وزیراعظم نے کویت کے امیر کو جلد از جلد پاکستان کا سرکاری دورہ کرنے کی دعوت کا بھی اعادہ کیا۔
