شیخ جعفرمندوخیل نے گورنر بلوچستان کے عہدے کا حلف اٹھا لیا ہے۔
گورنر ہاؤس بلوچستان میں نئے گورنر جعفر مندوخیل کی حلف برداری کی تقریب میں چیف جسٹس بلوچستان ہائیکورٹ جسٹس محمد ہاشم خان کاکڑ نے نئے گورنر سے حلف ان کے عہدے کا حلف لیا۔
مزید پڑھیں
نئے گورنر کی تقریب حلف برداری میں وزیر اعلیٰ بلوچستان میر سرفراز بگٹی، سابق گورنر بلوچستان ملک عبدالولی خان اور ڈپٹی اسپیکر بلوچستان اسمبلی غزالہ گولہ، صوبائی وزراد اور قبائیلی عمائدن نے شرکت کی۔
یاد رہے کہ شیخ جعفر مندوخیل بلوچستان کے 24ویں گورنر ہیں۔
شیخ جعفرمندوخیل کون ہیں؟
شیخ جعفرمندوخیل کا تعلق بلوچستان کے ایک معتبر سیاسی گھرانے سے ہے۔ ان کا خاندان نظریاتی اعتبار سے مسلم لیگی رہا ہے، انہوں نے اپنی سیاست کا آغاز مسلم اسٹوڈنٹس آرگنائزیشن کے پلیٹ فارم سے کیا۔
انہوں نے 1988 میں پہلی مرتبہ اپنے آبائی علاقے ژوب سے مسلم لیگ کے پلیٹ فارم سے بلوچستان اسمبلی کی نشست پر الیکشن لڑا اور 2013 تک ہونے والے عام انتخابات میں مسلسل 30 سال تک رکن بلوچستان اسمبلی منتخب ہوتے رہے، ان سے قبل اس نشست سے 1985 میں ہونے والے انتخابات میں ان کے چچا کامیاب ہوئے تھے۔
1977 میں انتخابات میں دھاندلی کے خلاف ملک بھر میں جب سیاسی جماعتوں نے انتخابات کا بائیکاٹ کیا تو شیخ جعفر مندوخیل کے والد نے اپنی جیت کے 100 فی صد امکانات ہونے کے باوجود انتخابی عمل کا بائیکاٹ کرکے ملک کی سیاسی قیادت کا ساتھ دیا۔
شیخ جعفر مندوخیل 1993 کے انتخابات میں آزاد حیثیت سے کامیابی کے بعد اپنے دیرینہ ساتھیوں سابق گورنر اور وزیراعلیٰ بلوچستان نواب ذوالفقار علی مگسی، میرجان محمد جمالی اور سعید احمد ہاشمی کے کہنے پر ق لیگ میں شامل ہوئے اور 2020 تک اس سے وابستہ رہے۔
شیخ جعفر مندوخیل 2021 میں مسلم لیگ ن میں شامل ہوگئے اور 2023 میں انہیں مسلم لیگ ن کا صوبائی صدر مقرر کیا گیا۔
