گورنر خیبرپختونخوا فیصل کریم کنڈی نے کہا ہے کہ خیبرپختونخوا کے عوام کا مقدمہ اسلام آباد میں لڑوں گا۔ کوشش ہو گی کہ خیبرپختونخوا کے عوام کا وکیل بنوں۔ یہ نہیں کہ میں سڑکوں پر کھڑے ہو کر بڑھکیں ماروں کہ پیسے واپس دیں، مختلف فورمز موجود ہیں جہاں پر اپنا مقدمہ لڑیں گے، بھرپور کوشش ہوگی نفرتیں نہیں محبتیں بڑھاؤں۔
فیصل کریم کنڈی کا کراچی میں میڈیا سے گفتگو کرتے ہوئے کہنا تھا کہ پاکستان میں ہر شہری آزاد ہے، پاکستان میں آئین بھی ہے اور قانون بھی، اگر وزیراعلیٰ خیبر پختونخوا اسلام آباد پر چڑھائی کریں گے تو وہ کسی اور گھر جائیں گے۔ اپنی نااہلی اور کوتاہی چھپانے کے لیے اس قسم کا مؤقف نہیں دینا چاہیے۔
مزید پڑھیں
انہوں نے کہا کہ وزیراعلیٰ خیبرپختونخوا کے پاس اکثریت ہے پھر بھی اسمبلی اجلاس بلانے سے خائف ہیں، یہ نہیں ہو سکتا کہ آپ اپنا حق سڑکوں پر نکل کر مانگیں، میں اپنے صوبے کے کیس کو مضبوط کروں گا، صوبے میں موجود ہر سیاسی شخصیت کے پاس جانے کو تیار ہوں۔
فیصل کریم کنڈی کا کہنا تھا کہ انہوں نے بانی پی ٹی آئی سے غداری کرکے سیٹ لی، آج دیکھیں بانی پی ٹی آئی کے قریبی دوست کہاں ہیں، ہم کہتے ہیں سنجیدہ لوگوں کو آگے آنا چاہیے اور بات کرنی چاہیے، ہم ٹف ٹائم کسی کو نہیں دیں گے، صوبے کی ترقی کے لیے کام کریں گے۔
گورنر کنڈی کا کہنا تھا کہ گورنر ہاؤس مولانا فضل الرحمان کا ہے، وہ آئیں اور بات کریں، مولانا صاحب ہمارے سینئر سیاستدان ہیں وہ ہمیں مشورے دیں اور صوبے کی ترقی کے لیے کام کریں۔ مجھے کسی سے خوف نہیں، ہم نہیں چاہتے کوئی محدود رہے ہر سیاسی پارٹی کو موقع ملنا چاہیے۔
