پیٹرولیم مصنوعات کی قیمتوں میں اضافہ: جماعت اسلامی کا 3 ستمبر کو ملک گیر ہڑتال کا اعلان

جماعت اسلامی پاکستان کے امیر حافظ نعیم الرحمان نے پیٹرولیم مصنوعات پر لیوی اور قیمتوں میں اضافے کے خلاف 3 ستمبر کو ملک گیر مکمل ہڑتال کا اعلان کر دیا ہے۔

یہ بھی پڑھیں: جماعت اسلامی گرینڈ اپوزیشن اتحاد کا حصہ نہیں بنے گی، حافظ نعیم الرحمان کا صاف انکار

لاہور میں دھرنے سے خطاب کرتے ہوئے انہوں نے کہا کہ عوام پٹرول کی قیمتوں میں کمی کے مطالبات لے کر سڑکوں پر نکلے ہیں اور اس ناانصافی کے خلاف جماعت اسلامی 3 ستمبر کو شٹر ڈاؤں ہڑتال کرے گی۔

حافظ نعیم الرحمان نے واضح کیا کہ 3 ستمبر کی ہڑتال مکمل طور پر پرامن ہوگی اور ایک گملا بھی نہیں ٹوٹے گا۔

انہوں نے کہا کہ ہڑتال کی کامیابی کے لیے تاجروں سے رابطہ کیا جائے گا اور وہ خود تاجر برادری سے ملاقاتیں کریں گے۔

راولپنڈی میں گرینڈ ریلی

امیر جماعت اسلامی نے 30 اگست کو راولپنڈی میں ایک عظیم الشان ریلی نکالنے کا بھی اعلان کیا۔

مزید پڑھیے: پٹرولیم لیوی کے خلاف جماعت اسلامی کا ملک گیر شٹر ڈاؤن کا اعلان، اسلام آباد مارچ کا عندیہ

حافظ نعیم الرحمان نے خبردار کیا کہ ہماری پرامن سیاسی مزاحمت کو کمزوری نہ سمجھا جائے۔ اگر عوام کے مطالبات نہ مانے گئے تو احتجاج کا دائرہ وسیع کیا جائے گا، جس میں لانگ مارچ اور پہیہ جام ہڑتال جیسے تمام جمہوری آپشنز شامل ہیں۔

حکومتی ردعمل

دوسری جانب وزیراعظم کے مشیر برائے سیاسی امور رانا ثنا اللہ نے ایک نجی ٹی وی پروگرام میں گفتگو کرتے ہوئے دعویٰ کیا کہ عوام نے جماعت اسلامی کے دھرنے کو مسترد کر دیا ہے اور یہ احتجاج خود ان کے لیے سبکی کا باعث بن رہا ہے اس لیے جماعت اسلامی کو اب یہ دھرنا خود ختم کر دینا چاہیے۔