حکومت نے ایئر سیال کو برطانیہ و چین سمیت 7 ممالک میں فلائٹ آپریشنز شروع کرنے کی منظوری دے دی۔
اس بات کا فیصلہ وزیراعظم محمد شہباز شریف کی زیر صدارت وفاقی کابینہ کے منگل کو وزیراعظم ہاؤس میں منعقد ہونے والے اجلاس میں کیا گیا۔
وفاقی کابینہ نے وزارت ہوا بازی کی سفارش پر ایئر سیال کو چین، ملائشیا، سری لنکا، تھائی لینڈ، ترکیہ، برطانیہ اور کویت میں فلائیٹ آپریشنز شروع کرنے کی منظوری دی۔ یہ منظور ی نیشنل ایوی ایشن پالیسی 2023 اور ایئر سروسز ایگریمنٹ کے تحت دی گئی ہے۔
کابینہ نے وزارت تجارت کی سفارش پر اسلامی جمہوریہ پاکستان اور کنگڈم آف کولمبیا کے درمیان مشترکہ تجارتی کمیٹی کے قیام حوالے سے مفاہمتی یادداشت پر دستخط جبکہ وزارت وفاقی تعلیم و فنی تربیت کی سفارش پر ڈائیریکٹوریٹ جنرل آف اسپیشل ایجوکیشن کو وفاقی وزارت انسانی حقوق سے وزارت وفاقی تعلیم و فنی تربیت کے حوالے کرنے کی بھی منظوری دے دی۔
وفاقی کابینہ نے کابینہ کمیٹی برائے چینی سرمایہ کاری منصوبہ جات کی 30 اپریل 2024 کو ہوئے اجلاس میں کیے گئے فیصلوں کی توثیق بھی کر دی۔
وزیراعظم محمد شہباز شریف نے اجلاس کے شرکا سے گفتگو کرتے ہوئے کہا کہ سعودی سرمایہ کار وفد کی پاکستان آمد سعودی عرب اور پاکستان کے معاشی تعلقات کے حوالے سے انتہائی اہم پیشرفت ہے۔
شہباز شریف نے اس دورے کو کامیاب بنانے کے حوالے سے وفاقی وزرا، افسران اور اسٹاف کی کارکردگی کو سراہا۔
