پاسپورٹ بنوانے کے لیے بڑی سہولت، لاہور اور کراچی میں پاسپورٹ دفاتر 24 گھنٹے کھلیں گے

وزارت داخلہ نے عوام کو پاسپورٹ بنوانے کے لیے بڑی سہولت دے دی، لاہور اور کراچی میں پاسپورٹ دفاتر اب 24 گھنٹے کھلے رہیں گے۔

ڈائریکٹوریٹ جنرل امیگریشن اینڈ پاسپورٹس کے جاری کردہ نوٹیفکیشن کے مطابق وفاقی وزیرداخلہ محسن نقوی کے احکامات پر گارڈن ٹاون لاہور اور عوامی مرکز کراچی کے پاسپورٹ دفاتر 24 گھنٹے کھلیں رہیں گے۔

وزیرداخلہ محسن نقوی کا کہنا ہے کہ عوام کی سہولت کے لیے لاہور اور کراچی میں پاسپورٹ آفس 24 گھنٹے کھلیں رہیں گے، اس اقدام سے عوام کی مشکلات کا ازالہ ہو گا، پوری کوشش ہے کہ عوام کو پاسپورٹ بنوانے میں دقت پیش نہ آئے۔

یاد رہے کہ 2 دن قبل وزیرداخلہ محسن نقوی نے سماجی رابطے کے پلیٹ فارم ’ایکس‘ پر ایک پوسٹ میں کہا تھا کہ عوام کو سہولت فراہم کرنے کے لیے لاہور اور کراچی دونوں شہروں میں کم از کم ایک پاسپورٹ آفس 24 گھنٹے کھلا رہے گا۔

محسن نقوی نے کہا تھا کہ شہریوں کے لیے کسی بھی وقت پاسپورٹ آفس کی سہولیات تک رسائی آسان اور ممکن ہوگی۔

اس سے قبل وزیر داخلہ محسن نقوی نے لاہور کے پاسپورٹ آفس گارڈن ٹاؤن کا دورہ کیا تھا، جہاں شہریوں نے ان سے پاسپورٹ بنانے کے لیے رشوت لیے جانے سے متعلق شکایات کی تھیں۔

وزیر داخلہ نے خراب ٹوکن مشین اور پاسپورٹ آفس کے حالات دیکھ کر برہمی کا اظہار کیا تھا، وہاں کے ڈائریکٹر اور اسسٹنٹ ڈائریکٹر کو تبدیل کرکے محکمانہ کارروائی کا حکم دیا تھا۔