پاکستان کا پہلا مصنوعی سیارہ چاند کی پہلی تصویر کب بھیجے گا؟

پاکستان کا چاند پر بھیجا گیا پہلا سیٹلائٹ مشن ’آئی کیوب قمر‘ 6 دنوں کے بعد اب چاند کے مدار میں داخل ہو گیا ہے، 2 آپٹیکل کیمروں سے لیس پاکستانی سیٹلائٹ مشن 6 مہینے تک خلائی مدار میں رہے گا اور اس دوران یہ چاند کے گرد چکر لگاتے ہوئے چاند کی تصاویر لے گا، آئی کیوب کیو چاند کی پہلی تصویر 15 مئی کو بھیجے گا۔

آئی کیوب کیو کے کنٹرولز اور سسٹمز کا ٹیسٹ کیا جا رہا ہے

آئی کیوب کیو مشن کی ٹیم کے کور ممبر ڈاکٹر خرم خورشید نے وی نیوز سے خصوصی گفتگو کرتے ہوئے کہا کہ 3 مئی کو بھیجا گیا پاکستان کا آئی کیوب کیو چینی راکٹ چانگ ای 6 کے ذریعے چاند کے مدار میں داخل ہو گیا ہے، اب اگلے مرحلے میں آئی کیوب کیو کے کنٹرولز اور سسٹمز کا ٹیسٹ کیا جا رہا ہے، جسے مکمل کرنے میں 6 سے 7 دنوں کا وقت لگ سکتا ہے اور اس کے بعد پاکستانی مصنوعی سیارہ 15 مئی کو چاند کی پہلی تصویر بھیج دے گا۔

سیٹلائٹ مشن کا نام کس نے رکھا؟

ڈاکٹر خرم خورشید نے بتایا کہ پاکستانی سیٹلائٹ مشن کا نام ان کی تجویز پر ’آئی کیوب قمر‘ رکھا گیا، اس مشن کی منزل یعنی چاند کی مناسبت سے اس کے نام میں ’قمر‘ کا لفظ شامل کیا گیا تھا۔

’آئی کیوب‘ اس لیے کہ انسٹیٹیوٹ آف اسپیس ٹیکنالوجی میں موجود چھوٹے سیٹلائٹ پروگرام کا نام آئی کیوب ہے اور اس کے تحت انسٹیٹیوٹ کی جانب سے سنہ 2013 میں پہلا سیٹلائٹ مشن آئی کیوب ون‘ کے نام سے لانچ کیا گیا تھا‘۔

ڈاکٹر خرم خورشید کے مطابق ’آئی کیوب قمر‘ کا ڈیزائن اور اس کی تیاری چین اور سپارکو کے اشتراک سے کی گئی ہے۔