آئرلینڈ کے خلاف شکست کے بعد چیئرمین پی سی بی کی قومی ٹیم سے ملاقات، اہم پیغام پہنچایا

چیئرمین پاکستان کرکٹ بورڈ (پی سی بی) محسن نقوی نے ڈبلن میں قومی کھلاڑیوں سے 2 گھنٹے ملاقات کی جس میں ٹیم کی حکمت عملی پر تفصیلی مشاورت کی گئی جب کہ اس دوران محسن نقوی نے کھلاڑیوں کا حوصلہ بڑھایا اور ساتھ ہی کھلاڑیوں کو محنت، جذبے اور پروفیشنل اپروچ کے ساتھ کھیلنے کی تلقین کی۔

محسن نقوی نے کہا کہ ٹی20 کرکٹ یکسر مختلف اور جارحانہ اپروچ کی حامل ہے، ٹی20 کرکٹ کے جدید و نئے انداز کے مطابق کھیل کر ہی جیت ممکن ہو گی، کمرے میں بیٹھ کر حکمت عملی بنائی جاسکتی ہے لیکن اصل امتحان میدان میں ہوتا ہے۔

انہوں نے کہا کہ بلاشبہ تمام کھلاڑی باصلاحیت، پروفیشنل اور بہترین ہیں، بولنگ اٹیک شاندار ہے، تاہم فیلڈنگ پر بہت توجہ کی ضرورت ہے، پاکستانی قوم کرکٹ سے محبت کرتی ہے اور قوم کو اپنے کھلاڑیوں سے امیدیں ہیں۔

چیئرمین پی سی بی کا کہنا تھا کہ آئرلینڈ سے پہلے میچ میں شکست کو کوئی بھی قبول نہیں کر رہا، آئرلینڈ اور انگلینڈ کے بعد اصل امتحان ورلڈکپ ہے۔