غزہ اور رفح پر تازہ اسرائیلی جارحیت، درجنوں فلسطینی شہید

اسرائیل اور فلسطین تنازع کے دوران صہیونی فوج کے شمالی غزہ اور رفح میں حملوں کا سلسلہ جاری ہے، جس کے نتیجے میں گزشتہ 24 گھنٹوں میں 60 سے زیادہ فلسطینی شہید جبکہ درجنوں زخمی ہوگئے۔

غزہ شہر میں شہریوں کے ہجوم پر بھی اسرائیلی فوج کی جانب سے میزائل برسائے گئے، جس میں معصوم شہریوں کی جانیں ضائع ہوئیں، اور کئی افراد زخمی ہوگئے۔ دوسری جانب اسرائیلی حملوں کے ردعمل میں فلسطینی مزاحمت کاروں کی جوابی کارروائیاں بھی جاری ہیں۔

رفح اور شمالی غزہ میں چڑھائی کرنے والی اسرائیلی فوج کی فلسطینی مزاحمت کاروں سے شدید جھڑپیں جاری ہیں، القسام بریگیڈ نے رفح میں اسرائیلی ٹینکوں پر ڈرامائی حملے کی وڈیو بھی جاری کی ہے، جس میں دیکھا جا سکتا ہے کہ کس طرح ٹینک کے نیچے بارودی سرنگ نصب کرکے راکٹوں سے نشانہ بنایا گیا ہے، جو درجنوں اسرائیلی فوجیوں کی ہلاکت کا بارث بنا ہے۔

دوسری طرف یمن کے حوثی باغیوں اور جنوبی لبنان میں حزب اللہ کی بھی اسرائیلی فوج سے جھڑپیں جاری ہیں، جنوبی لبنانی علاقے پر اسرائیلی حملے میں حزب اللہ کا سینیئر کمانڈر شہید ہوا ہے۔

حزب اللہ نے جوابی حملے میں اسرائیل کے میرون فوجی اڈے پر درجنوں راکٹ برسائے، یمن کے حوثی باغیوں نے بھی بحیرہ احمر میں امریکی جنگی جہاز پر کامیاب میزائل حملے کیے گئے۔

واضح رہے کہ 7 اکتوبر 2023 کے بعد سے غزہ میں اسرائیلی حملوں کے نتیجے میں کم از کم 35 ہزار 233 افراد شہید اور 79 ہزار 141 سے زائد زخمی ہوچکے ہیں، جن میں بچوں اور خواتین کی تعداد نصف سے بھی زیادہ ہے۔