گورنر گلگت بلتستان سید مہدی شاہ نے اسماعیلی مسلمانوں کے روحانی پیشوا پرنس کریم آغا خان کے بڑے صاحبزادے پرنس رحیم آغا خان سے ملاقات کی ہے۔ گورنر گلگت بلتستان نے پرنس رحیم آغا خان کو حکومت پاکستان کی جانب سے نشان پاکستان ملنے پر مبارکباد پیش کی۔
گورنر گلگت بلتستان نے کہا کہ آغا خان ڈویلپمنٹ نیٹ ورک نے پاکستان اور بالخصوص گلگت بلتستان کی تعمیر و ترقی میں نمایاں کردار ادا کیا ہے۔ جس پر انہیں خراج تحسین پیش کیا جاتا ہے۔
مزید پڑھیں
پرنس رحیم آغاخان نے کہا کہ انہیں پاکستان اور گلگت بلتستان کے لوگوں سے خصوصی محبت ہے اور وہ علاقے کی خوشحالی کے لیے مزید اقدامات کریں گے۔ گلگت بلتستان کے لیے انرجی، سیاحت، صحت اور تعلیم کے شعبوں میں مزید کام کیا جائے گا۔ گلگت بلتستان نہ صرف اپنی قدرتی خوبصورتی کی وجہ سے مشہور ہے بلکہ یہاں کے لوگ بھی بے حد خوبصورت ہیں۔
پرنس رحیم آغاخان نے کہا کہ وہ گلگت بلتستان میں سیاحت کو فروغ دینے اور دنیا بھر سے سیاحوں کو یہاں آنے کی ترغیب دینے کے لیے اپنا بھرپور کردار ادا کریں گے۔
اس موقع پر گورنر گلگت بلتستان نے پرنس کریم آغا خان کا گلگت بلتستان کی تعمیر و ترقی میں خصوصی کردار ادا کرنے پر شکریہ ادا کیا اور انہیں گلگت بلتستان کے خصوصی دورے کی دعوت بھی دی۔
