آئین توڑنے والے سن لیں! ایک وقت آئے گا آپ کو پھانسی پر لٹکائیں گے، وزیراعلیٰ کے پی علی امین گنڈاپور

وزیراعلیٰ خیبرپختونخوا علی امین گنڈاپور نے کہا ہے کہ آئین توڑنے والے سن لیں! ایک وقت آئے گا آپ کو پھانسی پر لٹکائیں گے۔

سوات میں جلسہ عام سے خطاب کرتے ہوئے علی امین گنڈاپور نے کہاکہ عمران خان ایک سوچ اور نظریے کا نام ہے جسے کوئی ختم نہیں کرسکتا، جس دن اس نے ہمیں باہر نکلنے کی کال دی تو جعلی حکومت نظر نہیں آئے گی۔

انہوں نے کہاکہ ملک اداروں اور شخصیات کے فیصلوں سے نہیں آئین کے تحت چلتے ہیں مگر آج عمران خان جعلی کیسز میں جیل میں بند ہیں۔

انہوں ںے کہاکہ عمران خان 300 سے زیادہ دنوں سے جیل میں ہیں، ایسا کرنے والے یاد رکھیں گے کہ ہم اس سب کا حساب لیں گے اور ایک دن کا 100 دن کے برابر تمہیں حساب دینا پڑے گا۔

سوات

وزیر اعلی خیبر پختونخوا علی امین گنڈاپور کا جلسے سے خطاب #PTISwatJalsa#آئین_کو_بحال_کرو pic.twitter.com/mQhljH90O2

— PTI (@PTIofficial) June 8, 2024

علی امین گنڈاپور نے کہاکہ جس ذوالفقار بھٹو کے لیے ملک کے ٹکڑے کیے گئے پھر اسے بھی پھانسی دے دی، یہ ملک کسی کے باپ کا نہیں ہے۔

انہوں نے کہاکہ ہم اپنا حق چھین کر لینا اچھی طرح جانتے ہیں، کوئی کشمیر والوں سے پوچھ لے کہ ان کے ساتھ آزادی کی جنگ کس نے لڑی تھی۔

عمران خان جلد رہا ہو جائیں گے، بیرسٹر گوہر

قبل ازیں جلسے سے خطاب کرتے ہوئے پاکستان تحریک انصاف (پی ٹی آئی) کے چیئرمین بیرسٹر گوہر نے کہاکہ عمران خان بہت جلد رہا ہو جائیں گے۔

بیرسٹر گوہر نے کہاکہ عمران خان جیل میں اپنے نظریے پر کھڑے ہیں اور ان کا موقف ہے کہ اپنے ساتھ زیادتی معاف کرتا ہوں مگر ملک کے ساتھ کی گئی زیادتی کو معاف نہیں کروں گا۔