اسلام آباد انٹرنیشنل ایئرپورٹ کی آؤٹ سورسنگ کے لیے مقامی اور غیر ملکی سرمایہ کاروں پر مشتمل مختلف کنسورشیمز کے درمیان مقابلہ 15 جولائی 2024 کو متوقع ہے۔
مزید پڑھیں
جمعرات کو اسلام آباد میں نائب وزیراعظم اور وزیر خارجہ سینیٹر محمد اسحاق ڈار کی زیر صدارت اسلام آباد، کراچی اور لاہور کے ہوائی اڈوں کی آؤٹ سورسنگ سے متعلق اسٹیئرنگ کمیٹی کے 10ویں اجلاس کے دوران انٹرنیشنل فنانس کارپوریشن (آئی ایف سی) نے اسلام آباد انٹرنیشنل ایئرپورٹ کی آؤٹ سورسنگ پر پیشرفت رپورٹ پیش کی اور بتایا کہ مقامی اور غیر ملکی سرمایہ کاروں پر مشتمل مختلف کنسورشیمز کے درمیان صحت مند مقابلہ 15 جولائی 2024 کو متوقع ہے۔
اسٹیئرنگ کمیٹی نے لاہور اور کراچی ایئرپورٹس کی آؤٹ سورسنگ پر پیشرفت کا بھی جائزہ لیا اور اب تک کیے گئے کام پر اطمینان کا اظہار کیا۔
منصوبے کے مطابق دونوں ہوائی اڈوں کے لیے رعایتی ڈھانچہ اس سال اگست کے وسط تک تیار ہوجائے گا۔
بیان کے مطابق اجلاس میں اس توقع کا اظہار کیا گیا کہ اسلام آباد انٹرنیشنل ایئرپورٹ کی آؤٹ سورسنگ کے نتیجے میں صارفین کو بہتر تجربے کے ساتھ عالمی معیار کی سروس میسر آئے گی۔
اجلاس میں وزیر دفاع و ہوابازی، وزیر قانون و انصاف، سیکریٹری ایوی ایشن، بورڈ آف انویسٹمنٹ، سول ایوی ایشن اتھارٹی کے حکام اور انٹرنیشنل فنانس کارپوریشن (آئی ایف سی) کی ٹیم نے شرکت کی۔
