بھارتی ٹیلی وژن انڈسٹری کی معروف اداکارہ حنا خان میں حال ہی میں چھاتی کے سرطان کی تشخیص ہوئی ہے جس کے بعد ان کی کیموتھراپی جاری ہے انہوں نے سوشل میڈیا پر اپنے بال کٹوانے کی ویڈیو شیئر کر دی جس میں ان کی والدہ کو روتے ہوئے سنا جا سکتا ہے۔
فوٹو اینڈ ویڈیو شیرنگ ایپ انسٹاگرام پر شیئر کی گئی ویڈیو میں دیکھا جاسکتا ہے کہ حنا کے ساتھ ان کے ہیئر اسٹائلسٹ اور والدہ کمرے میں موجود ہیں۔ اداکارہ کی والدہ کی رونے کی آواز کو سنا جا سکتا ہے جس پر حنا خان والدہ کی ڈھارس بندھاتے ہوئے کہہ رہی ہیں کہ آپ نے بھی کئی مرتبہ اپنے بال چھوٹے کروائے ہیں، یہ صرف بال ہیں روئیں نہیں آپ کی طبیعت خراب ہو جائے گی۔
View this post on Instagram
اداکارہ نے ویڈیو کی کیپشن میں لکھا کہ وہ اپنے خبصورت بالوں کو گرنے سے پہلے ہی کٹوا رہی ہیں۔وہ اپنے ہی بالوں سے اپنی لیے وِگ بنوائیں گی اور جب ان کے بال مکمل اتریں گے تو وہ اس وِگ کا استعمال کریں گی۔
ان کا کہنا تھا کہ کینسر سے جنگ جیتنے کے بعد ان کے بال اور بھنویں واپس آ جائیں گی اور کیمو تھراپی کے نشانات بھی مٹ جائیں گے اور وہ اس جنگ کو جیتنے کے لیے ہر ممکن کوشش کریں گی۔
حنا خان نے کہا کہ وہ اپنی کہانی اور کینسر سے جنگ لڑنے کے سفر کو ریکارڈ کر رہی ہیں تاکہ ان کی کوششیں ہر ایک تک پہنچیں، انہوں نے آخر میں مداحوں سے دعا کی درخواست کی جو ان کے لیے دعا گو نظر اور ہمت بندھاتے نظر آئے۔
