ایران کے نو منتخب صدر ڈاکٹر مسعود پزشکیان نے کہا ہے کہ وہ سب کی طرف دوستی کا ہاتھ بڑھائیں گے۔
ہفتے کے روز اپنی جیت کے اعلان کے بعد اصلاح پسند مسعود پزشکیان نے کہا ’ہم سب کی طرف دوستی کا ہاتھ بڑھائیں گے، ہم سب اس ملک کے لوگ ہیں اور ہمیں اس ملکی ترقی کے لیے سب کی مدد لینا چاہیے۔‘
سوشل میڈیا پلیٹ فارم ایکس پر ایک پوسٹ میں انہوں نے اس بات پر زور دیا کہ ہمارے آگے مشکل راستہ ہے جو صرف آپ کے ساتھ دینے، آپ کی ہمدردی اور بھروسے کی وجہ سے ہی آسان ہو گا۔
یہ بھی پڑھیں : اصلاح پسند امیدوار مسعود پزشکیان ایران کے نئے صدر منتخب
واضح رہے کہ اس سے قبل پزشکیان نے اگست 2001 اور اگست 2005 کے درمیان اصلاح پسند صدر محمد خاتمی کے تحت وزیر صحت کے طور پر خدمات انجام دی تھیں۔
حالیہ انتخابی مہم کے ایران کے سابق وزیرخارجہ محمد جواد ظریف کے ہمراہ اپنی انتخابی مہم کے دوران نومنتخب صدر مسعود پزشکیان نے کہا تھا کہ وہ تمام ممالک سے بہتر تعلقات قائم کریں گے۔
جواد ظریف نے وزارت خارجہ پر 8 سال گزارے اور اس مدت میں انہوں نے مغربی ممالک کے ساتھ ایران کے تعلقات مضبوط کرنے کی کوشش کی۔
یہ بھی پڑھیں : نومنتخب ایرانی صدر ڈاکٹر مسعود پزشکیان کون ہیں؟
واضح رہے کہ 5 جولائی کو ایرانی صدارتی الیکشن کے دوسرے مرحلے (رن آف) میں اصلاح پسند امیدوار مسعود پزشکیان ایک کروڑ 63 لاکھ ووٹ لیکر ایران کے صدر منتخب ہوئے ہیں، جبکہ ان کے انتخابی حریف رجعت پسند سعید جلیلی ایک کروڑ 35 لاکھ ووٹ لے سکے۔
اس سے قبل 28 جون کو ایران میں صدارتی انتخاب منعقد ہوئے تھے، تاہم انتخاب میں کوئی بھی امیدوار مطلوبہ 50 فیصد سے زیادہ ووٹ حاصل نہ کرسکا تھا جس کے بعد 5 جولائی کو صدارتی انتخاب کا دوسرا مرحلہ منعقد کرنے کا اعلان کیا گیا تھا، پہلے مرحلے میں ووٹرز کی شرح 40 فیصد رہی تھی جو ایرانی صدارتی انتخاب کے تمام ادوار میں سب سے کم شرح ہے۔
