سابق وزیر اعظم عمران خان کے بھتیجے حسان اللہ نیازی کے خلاف مقدمات ختم کرنے کی درخواست پر سندھ ہائیکورٹ نے فریقین کے وکلاء کو کل ( جمعرات) دلائل دینے کی ہدایت کر دی۔
تحریک انصاف کے چیئرمین عمران خان کے فوکل پرسن حسان نیازی کے خلاف مقدمات ختم کرنے کے لیے ان کے والد حفیظ اللہ نیازی کی درخواست کی سماعت سندھ ہائیکورٹ میں ہوئی، سندھ ہائیکورٹ کے دو رکنی بینچ نے درخواست پر سماعت کی۔
سندھ ہائی کورٹ کے دو رکنی بینچ نے فوری سماعت کی استدعا پر کل دلائل دینے کی ہدایت کردی۔
درخوست گزار حفیظ اللہ نیازی نے عدالت سے استدعا کی کہ بیٹے کے خلاف مقدمات کی تفصیلات فراہم کی جائیں۔ ایک ہی معاملے کی ایک سے زیادہ ایف آئی آر نہیں درج کی جا سکتی۔ حسان نیازی کے خلاف مقدمات خارج کیے جائیں۔
حفیظ اللہ نیازی کے وکیل ظہور محسود ایڈوکیٹ کا کہنا ہے کہ ہم نے عدالت سے درخواست کی کہ یہ معاملہ ایک وکیل کا ہے۔
عدالت نے درخواست کل سماعت کے لیے مقرر کر دی ۔
جسٹس کے کے آغا نے ریمارکس دیے کہ آج کیسز کا دباؤ زیادہ ہے، آپ کل فوری سماعت کے معاملے پر دلائل دیں۔
