قومی اسمبلی کی ایوی ایشن کی قائمہ کمیٹی اجلاس میں انکشاف ہوا ہے کہ پی آئی اے کے ایک طیارے کے لیے اوسطاً 304 ملازمین تعینات ہیں۔
ایوی ایشن ڈویژن کے سیکریٹری سیف انجم نے گزشتہ روز قومی اسمبلی کی ایوی ایشن کمیٹی کو بریفنگ دیتے ہوئے بتایا کہ پی آئی اے کے پاس 34 طیارے ہیں جن میں سے 13 ڈرائی لیز پر ہیں اور باقی ایئر لائن کی ملکیت ہیں۔ پی آئی اے کے ملازمین کی تعداد 10 ہزار 323 ہے، جن میں سے 7 ہزار 399 ریگولر ہیں اور 2 ہزار 924 کنٹریکٹ پر ہیں۔
پاکستان سول ایوی ایشن اتھارٹی (پی سی اے اے) کی کارکردگی پر اجلاس کو بتایا گیا کہ ریگولیٹر ملک کے 43 میں سے 22 ہوائی اڈے چلا رہا ہے، جن میں سے 13 بین الاقوامی ہیں۔ پی آئی اے کی نجکاری کا عمل قریباً مکمل ہو چکا ہے۔
مزید پڑھیں:پی آئی اے کی پرواز میں دھماکے کی آواز، ریاض میں ہنگامی لینڈنگ
اجلاس کو بتایا گیا کہ ایوی ایشن ریگولیٹر کو کئی برس سے ترقیاتی بجٹ میں رکاوٹوں کا سامنا ہے، جس کی وجہ سے وہ پرانے آلات استعمال کرنے پر مجبور ہے۔ ایئرپورٹ سیکیورٹی فورس (اے ایس ایف) کے نمائندے نے بھی فنڈز کی کمی کی شکایت کی، جس کی وجہ سے فورس پرانے سیکیورٹی گیجٹس استعمال کرنے پر مجبور ہے۔
اجلاس کو بتایا گیا کہ اے ایس ایف کے 15 ہزار 565 اہلکار ہیں جن میں 14 ہزار 135 وردی والے اور 873 سویلین عملہ شامل ہے، جب کہ ملک بھر میں واقع 43 ہوائی اڈوں میں سے 22 پر اے ایس ایف تعینات ہے۔
پاکستان پیپلزپارٹی کے ایم این اے نوابزادہ افتخار احمد خان کی سربراہی میں ہونے والے کمیٹی اجلاس میں علامہ اقبال انٹرنیشنل ایئرپورٹ، لاہور میں ایئر کرافٹ پارکنگ ایریا میں دراڑیں پڑنے پر تشویش کا اظہار کیا گیا۔ ایوی ایشن حکام نے مسئلے کو تسلیم کرتے ہوئے بتایا کہ مرمت کا کام جاری ہے۔
مزید پڑھیں:پی آئی اے کی پرواز میں دھماکے کی آواز، ریاض میں ہنگامی لینڈنگ
کمیٹی نے ایرو میڈیکل اسٹاف کی تقرری اور پائلٹس کے لائسنسنگ پر بھی سوال اٹھایا اور ان معاملات پر جامع رپورٹ طلب کی۔ نجی ایئر لائنز کی تاخیر اور مسافروں کو درپیش تکلیف سے متعلق شکایات پر کمیٹی ممبر نے کہا کہ 2 پرائیویٹ کیریئرز ایئر بلیو اور ایئر سیال کو نوٹس جاری کیے گئے ہیں، کیونکہ بار بار تاخیر کا جواز پیش کرنے کی کوئی منطق نہیں ہے۔
انہوں نے مزید کہا کہ اگر پی آئی اے کی پروازوں میں تاخیر ہوئی تو اسے بھی نوٹس دیا جائے گا۔ ایک اور سوال کے جواب میں انہوں نے بتایا کہ فزیبلٹی کی وجہ سے نجی ایئر لائنز اسلام آباد لاہور اسلام آباد روٹ پر پروازیں چلانے میں دلچسپی نہیں رکھتیں۔
کمیٹی نے پرواز کے اندر کیٹرنگ سروسز کے معیار کو بہتر بنانے اور پی سی اے اے کے عملے کے مسافروں کے ساتھ اچھا برتاؤ رکھنے کی ہدایت کی۔ اے ایس ایف کے نمائندے نے اجلاس کو بتایا کہ وی وی آئی پیز کے علاوہ کسی کو بھی ہوائی اڈوں پر تلاشی سے استثنیٰ حاصل نہیں۔
مزید پڑھیں:پی آئی اے نے متحدہ عرب امارات کے لیے اپنا فضائی آپریشن کیوں معطل کیا؟
کمیٹی کی سربراہی نوابزادہ افتخار احمد خان بابر نے کی۔ اجلاس میں سیکریٹری ایوی ایشن سیف انجم، ایئرپورٹ سیکیورٹی فورس (اے ایس ایف) کے ڈائریکٹر میجر جنرل عدنان آصف جاہ اور وزارت ایئرپورٹ سیکیورٹی کے حکام نے شرکت کی۔
