بھارتی کرکٹ اسٹار ہاردک پانڈیا نے اہلیہ سے علیحدگی اختیار کرلی، ہاردک پانڈیا نے آج اپنے ایک بیان میں نتاشا اسٹینکووچ سے علیحدگی کا اعلان کرتے ہوئے کہا کہ 4سال ساتھ رہنے کے بعد، دونوں نے باہمی طور پر الگ ہونے کا فیصلہ کیا ہے۔
ہاردک پانڈیا نے ان کے تعلقات کے بارے میں قیاس آرائیوں کو ختم کرتے ہوئے اپنی اہلیہ نتاشا اسٹینکووچ سے علیحدگی کا اعلان کردیا۔ ٹیم انڈیا کے آل راؤنڈر نے اپنے آفیشل انسٹاگرام پروفائل پر ایک بیان جاری کرتے ہوئے اس خبر کی تصدیق کی۔
مزید پڑھیں: ہاردک پانڈیا کی نئی لڑکی کے ساتھ ویڈیو وائرل، بیوی نتاشا نے انسٹا اسٹوری پر کیا پیغام دیا؟
نتاشا اسٹینکووچ نے بھی انسٹاگرام اکاؤنٹ پر علیحدگی کی تصدیق کرتے ہوئے اپنے پیغام میں کہا کہ 4 سال ساتھ رہنے کے بعد میں نے اور ہاردک نے باہمی طور پر الگ ہونے کا فیصلہ کیا ہے۔ دونوں نے مل کر اپنی پوری کوشش کی اور اپنا سب کچھ دیا، لیکن کارگر نہ ہوسکا، اس لیے علیحدگی اختیار کرنا پڑی، لیکن ابھی ہمیں یقین ہے کہ یہ ہم دونوں کے بہترین مفاد میں ہے۔
انہوں نے لکھا کہ یہ ہمارے لیے ایک مشکل فیصلہ تھا، جسے ہم نے خوشی و باہمی احترام سے مکمل کیا، اس رشتے نے ہمیں ہمارے بیٹے آگستیہ سے نوازا، جو ہماری دونوں زندگیوں کے مرکز میں رہے گا اور اس کی خوشی کے لیے اسے وہ سب کچھ دیں گے جو ہم کرسکتے ہیں۔
خیال رہے گزشتہ چند مہینوں سے ہاردک اور نتاشا کے درمیان تعلقات کو لے کر قیاس آرائیاں جاری تھیں۔ کچھ عرصہ قبل نتاشا نے آل راؤنڈر کے ساتھ اپنی تمام تصاویر انسٹاگرام سے ڈیلیٹ کردی تھیں جس سے ان کی علیحدگی کی افواہوں کو ہوا ملی۔
واضح رہے ہاردک پانڈیا کا یہ بیان بھارتی کرکٹ بورڈ کی جانب سے سری لنکا کے خلاف ٹی20 سیریز کے لیے ٹیم انڈیا کے اسکواڈ کا اعلان کرنے کے فوراً بعد آیا ہے، جس میں سوریہ کمار یادو کو ٹی20 کا نیا کپتان مقرر کیا گیا ہے۔
یہ بھی پڑھیں: ہاردک پانڈیا کی نئی لڑکی کے ساتھ ویڈیو وائرل، بیوی نتاشا نے انسٹا اسٹوری پر کیا پیغام دیا؟
ہاردک گزشتہ ماہ ورلڈ کپ میں ہندوستان کے آخری ٹی20 اسائنمنٹ میں نائب کپتان تھے، لیکن آل راؤنڈر کو فٹنس کے خدشات کی وجہ سے کپتانی کے لیے نظر انداز کر دیا گیا اور بتایا گیا کہ ہاردک کو اس فیصلے کے بارے میں پہلے ہی آگاہ کر دیا گیا تھا۔
