پاکستانی سپر ماڈل و اداکارہ ونیزہ احمد جنہوں نے کئی سال تک فیشن انڈسٹری میں کام کیا اور کئی ڈراموں میں اداکاری کے جوہر دکھائے انہوں نے حال ہی میں ایک مارننگ شو میں شرکت کی اور اپنی زندگی میں ہونے والی تبدیلی کے بارے میں گفتگو کی کہ کیسے ان کی چھوٹی بہن کے اچانک انتقال کے بعد ان کی زندگی میں تبدیلی آئی۔
ونیزہ نے اپنی بہن کے ساتھ پیش آئے حادثے کا ذکر کرتے ہوئے کہا کہ ان کی بہن کی اچانک موت نے ان کی زندگی کو بدل ڈالا۔ ان کا کہنا تھا کہ ہم ہر وقت مستقبل کی منصوبہ بندی کرتے رہتے ہیں اور اسلام سے دُور ہوجاتے ہیں لیکن انہیں یہ احساس ہوا کہ اللہ سے ہی مانگنا چاہیے اور اسی پر توکل کرنا چاہیے۔
اداکارہ کا کہنا تھا کہ پہلے وہ نہ نماز پڑھتی تھیں اور نہ قرآن پر عمل کرتی تھیں لیکن بہن کی اچانک موت نے انہیں اللہ کے بہت قریب کردیا۔ ونیزہ نے بتایا کہ ان کی بہن کو تعلیم حاصل کرنے کا بہت شوق تھا اس لیے انہوں نے اپنا گھر خریدنے کے بجائے اعلیٰ تعلیم کے لیے بہن کو بیرونِ ملک بھیجا۔
ماڈل و اداکارہ کے مطابق بہن کی اچانک موت کے بعد وہ ڈپریشن میں چلی گئی تھیں اور جب انہیں آگاہی ہوئی کہ اس کی زندگی ہی اتنی تھی اور وہ اس سے بہتر جگہ پر موجود ہیں تو انہیں کچھ تسلی ہوئی۔ ان کا کہنا تھا کہ ان کی بہن یہ احساس دے گئی کہ جو لمحہ میسر ہے ہمیں اسی لمحے میں جینا ہے اور جو نعمتیں اللہ نے ہمیں دی ہیں ہمیں ان نعمتوں کا شکر ادا کرنا چاہیے۔
واضح رہے کہ ونیزہ احمد کی بہن ایشا صدف خواجہ 2019 میں ایک خوفناک کار حادثے میں انتقال کر گئی تھیں۔
