پاکستان تحریک انصاف (پی ٹی آئی) کے سینیئر رہنما اسد قیصر نے کہا ہے کہ ہم کسی ادارے کے خلاف نہیں، سب کو بیٹھ کر سوچنا چاہیے کہ ملک کہاں جارہا ہے۔
نجی ٹی وی سے گفتگو کرتے ہوئے انہوں نے کہاکہ ہم ہر وہ کام کریں گے جس سے ملک میں استحکام آئے، عمران خان واضح طور پر کہہ چکے ہیں کہ ملک بھی ہمارا ہے اور فوج بھی ہماری ہے۔
یہ بھی پڑھیں کیا مذاکرات کی دعوت ایسے دیتے ہیں؟ پی ٹی آئی کا حکومتی پیشکش پر ردعمل
اسد قیصر نے کہاکہ ہمارا موقف رہا ہے کہ تمام ادارے اپنی آئینی حدود میں رہ کر کام کریں، اس کے علاوہ ملک آگے نہیں بڑھ سکتا۔
انہوں نے کہاکہ الیکشن میں دھاندلی تو چھوٹا لفظ ہے، فسطائیت کی انتہا کی گئی، ہم نے دو تہائی سے الیکشن جیتا مگر فارم 47 میں کسی اور کو حکومت دے دی گئی۔
اسد قیصر نے حکومت کو تنقید کا نشانہ بناتے ہوئے کہاکہ ان کی ضمیر مردہ ہیں، یہ کسی اور کے مینڈیٹ پر حکومت کررہے ہیں، ن لیگ کے 17 ایم این ایز کے سوا ہم ان کے ووٹ کو تسلیم ہی نہیں کریں گے۔
یہ بھی پڑھیں حالات ٹھیک ہونے والے ہیں، دسمبر تک حکومت پی ٹی آئی کی ہو گی، اسد قیصر کا دعویٰ
سابق اسپیکر نے کہاکہ یہ اگر قرارداد پاس کریں تو بھی اس کی کوئی حیثیت نہیں، حکومت کو عوامی مسائل کا احساس اس لیے نہیں کہ عوام نے ان کو ووٹ ہی نہیں دیا۔
انہوں نے کہاکہ اس وقت عوام میں فرسٹریشن ہے، ہم نہیں چاہتے کہ ملک انارکی کی طرف جائے، ہمارے ساتھ جس نے ظلم اور زیادتی کی وہ سب کو پتا ہے۔
