گوادر میں شرپسندوں کے حملے میں شہید سپاہی شبیر بلوچ کی نماز جنازہ ادا کردی گئی۔
پاک فوج کے شعبہ تعلقات عامہ (آئی ایس پی آر) کے جاری بیان کے مطابق، شہید کی نماز جنازہ گوادر میں ادا کی گئی۔ سپاہی شبیر بلوچ کی عمر 30 سال تھی اور وہ ضلع نصیرآباد کے رہائشی تھے۔
سپاہی شبیر بلوچ کی نماز جنازہ میں وزیر داخلہ بلوچستان میر ضیااللہ لانگو، پاک فوج کے افسران، جوانوں، سول اہلکاروں اور سماجی شخصیات نے شرکت کی۔
یہ بھی پڑھیں: گوادر میں مشتعل پرتشدد ہجوم کے حملے میں ایک فوجی جوان شہید، 16 زخمی
آئی ایس پی آر کے مطابق، نماز جنازہ کے بعد شہید کے جسد خاکی کو آبائی علاقے روانہ کر دیا گیا، جہاں انہیں مکمل فوجی اعزاز کے ساتھ سپرد خاک کیا جائے گا۔
واضح رہے کہ 29 جولائی کو نام نہاد بلوچ راجی موچی کی آڑ میں ایک پرتشدد ہجوم نے ضلع گوادر میں سیکیورٹی فورسز کے اہلکاروں پر حملہ کیا تھا۔ اس حملے میں سپاہی شبیر بلوچ نے جام شہادت نوش کیا تھا۔
یہ بھی پڑھیں: گوادر: بلوچ یکجہتی کمیٹی اور ضلعی انتظامیہ میں تصادم، 20 افراد گرفتار، بلوچستان بھر میں صورتحال کیا ہے؟
آئی ایس پی آر کے بیان کے مطابق، پرتشدد مظاہرین کی جانب سے بلا اشتعال حملوں کے نتیجے میں ایک افسر سمیت 16 فوجی جوان زخمی بھی ہوئے تھے۔
بیان میں کہا گیا تھا کہ سوشل میڈیا پر افواج پاکستان کے خلاف جعلی اور بدنیتی پر مبنی پراپیگنڈا کیا جا رہا ہے، پروپیگنڈا کرنے والوں کی جانب سے مسخ شدہ تصاویر اور ویڈیوز کا استعمال کرتے ہوئے لوگوں کو مشتعل کیا جا رہا ہے اور عوام کی ہمدردیاں حاصل کر کے انہیں پرتشدد مارچ پر اکسایا جا رہا ہے۔
