علیمہ خان کے بعد پاکستان تحریک انصاف (پی ٹی آئی) کی سیاسی کمیٹی اور کور کمیٹی کے ممبران نے بھی آج اسلام آباد میں ہونے والا پی ٹی آئی کا جلسہ ملتوی کرنے کے فیصلے پر تحفظات کا اظہار کردیا۔
پی ٹی آئی کی سیاسی اور کور کمیٹی کے ارکان نے آج اسلام آباد میں ہونے والا پی ٹی آئی کا جلسہ ملتوی ہونے پر تشویش اور اس بارے فیصلے سے متعلق لاعلمی کا اظہار کیا ہے۔
یہ بھی پڑھیں: پی ٹی آئی نے اسلام آباد جلسہ کیوں ملتوی کیا، وجہ سامنے آگئی
میڈیا رپورٹس کے مطابق، پی ٹی آئی کمیٹیوں کے ارکان نے کہا ہے کہ اپوزیشن اتحاد تحریک تحفظ آئین پاکستان کی جماعتوں سے بھی کوئی مشاورت نہ ہوئی، تحریک تحفظ آئین پاکستان کی قیادت اور جماعتیں جلسے میں شرکت کے لیے تیار تھیں۔
پی ٹی آئی کمیٹیوں کے اراکین کا کہنا ہے کہ پی ٹی آئی رہنماؤں نے اپوزیشن اتحاد کی جماعتوں کو آگاہ کیے بغیر جلسہ ملتوی کرنے کا اعلان کیا، اپوزیشن اتحاد کی جماعتوں اور قیادت کو میڈیا کے ذریعے جلسہ ملتوی کیے جانے کی اطلاع ملی، جلسے کی وجہ سے ایم ڈبلیو ایم کے سربراہ علامہ ناصر عباس ملک سے باہر نہیں گئے۔
یہ بھی پڑھیں: پی ٹی آئی کا جلسہ پھر ملتوی، ’ہر بار جلسہ منسوخ کرکے یہ عوام کو کیا پیغام دے رہے ہیں؟‘
اس سے پہلے، بانی پی ٹی آئی عمران خان کی بہن علیمہ خان نے بھی جلسہ ملتوی کیے جانے پر تحفظات کا اظہار کیا تھا۔ ان کا کہنا تھا کہ اعظم سواتی کس کے کہنے پر صبح صبح بانی پی ٹی آئی سے ملنے چلے گئے، انہوں نے کس کے کہنے پر بانی پی ٹی آئی کو جسلہ ملتوی کرنے کا پیغام پہنچایا۔
علیمہ خان کا آڈیو پیغام 🚨
لیڈرشپ کا ارادہ ہی نہیں عمران خان کو باہر نکالنے کا، ساڑھے 7 بجے اعظم سواتی عمران خان سے ملنے کیوں گیا تھا۔ اسے پیھلا دیں ہر جگہ pic.twitter.com/7auArgO6qY
— Faisal Khan (@KaliwalYam) August 22, 2024
انہوں نے کہا کہ ان لوگوں میں کارکنان کا سامنا کرنے کی ہمت نہیں تھی تو بانی پی ٹی آئی سے فیصلہ کروا دیا، موجودہ لیڈرشپ کا بانی پی ٹی آئی کو باہر نکالنے کا ارادہ ہی نہیں ہے، پارٹی کا چیئرمین باہر بیٹھا ہے، اس نے فیصلہ کیوں نہیں کیا، یہ فیصلے خود کرتے ہیں اور نام بانی پی ٹی آئی کا لگا دیتے ہیں۔
یہ بھی پڑھیں: پی ٹی آئی جلسہ ملتوی ہونے پر محمود اچکزئی کیوں ناراض ہیں؟
پاکستان تحریک انصاف کا اسلام آباد جلسہ ملتوی ہونے پر تحریک تحفظ آئین پاکستان کے سربراہ محمود خان اچکزئی بھی ناراضگی کا اظہار کرچکے ہیں۔ پی ٹی آئی نے جلسہ ملتوی کرنے سے قبل محمود خان اچکزئی کو اعتماد میں نہیں لیا۔ پی ٹی آئی کی جانب سے جلسہ ملتوی کرنے کے اعلان کے بعد محمود خان اچکزئی نے اتحادی جماعتوں کا ہنگامی اجلاس آج طلب کرلیا ہے۔ اپوزیشن کی اتحادی جماعتوں کا ہنگامی اجلاس آج ہوگا جس میں پی ٹی آئی کو شرکت کی دعوت نہیں دی گئی ہے۔
