محمد عامر کو قومی کرکٹ ٹیم میں واپسی کے لیے گرین سگنل مل گیا، پاکستان کرکٹ بورڈ نے محمد عامر کو انٹرنیشنل کرکٹ میں واپس لانے کے لیے تیاریاں مکمل کر لیں۔
پاکستان کرکٹ بورڈ کی سلیکشن کمیٹی کی اہم شخصیت نے محمد عامر کے منیجر سے رابطہ کیا ہے اور پیغام دیا ہے کہ ’ عامر سے کہو کہ خود کو انٹرنیشنل کرکٹ میں واپسی کے لیے تیار کر لے “۔
سلیکشن کمیٹی کی اہم شخصیت نے محمد عامر کو کہاہے کہ وہ اپنی کرکٹ پر توجہ دے اور میڈیا میں کوئی بھی بیان دینے سے باز رہے ، کیونکہ یہ نیا تنازع کھڑا کر سکتا ہے۔
ذرائع کا کہناتھا کہ جلد ہی محمد عامر سے رابطہ کرتے ہوئے انہیں ریٹائرمنٹ واپس لینے کا کہا جائے گا اور اس وقت تک کھلاڑی خود کو تیار کرنے کے لیے بھر پور محنت کرے۔
یہاں یہ امر قابل ذکر ہے کہ نجم سیٹھی نے چیئرمین مینجمینٹ کمیٹی کا چارج سنبھالنے کے بعد یہ بیان تھا کہ محمد عامر اگر اپنی ریٹائرمنٹ واپس لیتے ہیں تو ان کی سلیکشن پر غور کیا جا سکتا ہے ۔
