ویسٹ انڈیز نے بھارت کو چوتھے ٹی20 میچ میں 24 رنز سے شکست دے کر 5 میچوں کی سیریز 2-2 سے برابر کردی۔ حیدر آباد میں کھیلے گئے میچ میں ویسٹ انڈیز نے پہلے بیٹنگ کرتے ہوئے 3 وکٹوں کے نقصان پر 247 رنز بنائے، جواب میں بھارتی ٹیم 19.3 اوورز میں 223 رنز پر آؤٹ ہوگئی۔
ویسٹ انڈیز کے کپتان شائی ہوپ نے شاندار بیٹنگ کا مظاہرہ کرتے ہوئے 50 گیندوں پر ناقابل شکست 102 رنز بنائے۔ ان کی اننگز میں 4 چوکے اور 9 چھکے شامل تھے۔ شرفین ردرفورڈ نے بھی 26 گیندوں پر ناقابل شکست 49 رنز بنا کر ٹیم کو بڑے مجموعے تک پہنچانے میں اہم کردار ادا کیا۔
یہ بھی پڑھیں: شائی ہوپ کی سینچری، ویسٹ انڈیز نے بھارت کو ہرا کر ٹی 20 سیریز 1-1 سے برابر کردی
شمرون ہیٹ مائر نے 12 گیندوں پر 33 رنز کی جارحانہ اننگز کھیلی، جبکہ روومین پاول نے 24 اور جیول اینڈریو نے 21 رنز بنائے۔
بھارت کی جانب سے ارشدیپ سنگھ، پرنس یادو اور اکشر پٹیل نے ایک، ایک وکٹ حاصل کی، تاہم بھارتی بولرز ویسٹ انڈیز کی رنز بنانے کی رفتار روکنے میں ناکام رہے۔
248 رنز کے ہدف کے تعاقب میں بھارت کو سنجو سیمسن نے تیز آغاز فراہم کیا۔ انہوں نے 23 گیندوں پر 56 رنز بنائے، جس میں 6 چوکے اور 4 چھکے شامل تھے۔ تلک ورما نے 25 گیندوں پر 43 رنز جبکہ نتیش کمار ریڈی نے 20 گیندوں پر 41 رنز اسکور کیے۔
یہ بھی پڑھیں: شریاس ایئر کی شاندار سینچری، بھارت نے ویسٹ انڈیز کو پہلے ٹی20 میں 8 وکٹوں سے ہرا دیا
ابھیشیک شرما نے 29 اور کپتان شریاس ایر نے 16 رنز بنائے، تاہم بھارتی ٹیم وقفے وقفے سے وکٹیں گنواتی رہی اور مطلوبہ ہدف حاصل نہ کرسکی۔
ویسٹ انڈیز کے کیمو پال نے تباہ کن بولنگ کرتے ہوئے 41 رنز دے کر 5 وکٹیں حاصل کیں، جبکہ گداکیش موتی نے 2 کھلاڑیوں کو آؤٹ کیا۔ شمر اسپرنگر نے ایک وکٹ حاصل کی۔
اس فتح کے بعد 5 میچوں کی سیریز 2-2 سے برابر ہوگئی ہے، جبکہ سیریز کا پانچواں اور آخری میچ 17 اکتوبر کو بنگلورو میں کھیلا جائے گا۔
