وزیراعظم آزاد جموں و کشمیر چوہدری انوارالحق نے کہا ہے کہ وفاقی حکومت نے آزادکشمیر کے لیے تقریباً 19 ارب سے زیادہ کے منصوبوں کی منظوری دے دی ہے اس کے لیے پاکستان کی حکومت کے شکر گزار ہیں۔
یہ بھی پڑھیں:آزادکشمیر: مالی سال 25-2024 کا بجٹ پیش، تنخواہوں اور پینشن میں وفاق کی طرز پر اضافہ
انوارالحق نے مظفرآباد میں وزرا کے ہمراہ پریس کانفرنس سے خطاب کرتے ہوئے کہا کہ تحفظ ختم نبوت ہمارے ایمان کا حصہ ہے اور آزادکشمیر قانون ساز اسمبلی کو تحفظ ختم نبوت کے حوالے سے اعزاز حاصل ہے، انہوں نے کہا کہ اسی تسلسل میں 7 ستمبر کو آزادکشمیر میں سرکاری سطح پر یوم ختم نبوت منایا جائے گا۔
انہوں نےکہا کہ ہمیں فکری انتشار سے خود کو بھی بچانا ہے اور اپنی آنے والی نسلوں کو بھی بچانا ہے۔ آزاد کشمیر کے وزیراعظم نے کہا کہ روشن پاکستان تحریک آزادی کی ضمانت ہے، نظریہ الحاق پاکستان کا داعی ہوں اور اس پر کاربند رہوں گا۔
یہ بھی پڑھیں:آزاد کشمیر: ہیلتھ کارڈ کی فراہمی میں پیشرفت جاری ہے، وزیرخزنہ عبدالماجد
وزیراعظم آزاد کشمیر نے کہا کہ پبلک سروس کمیشن اور این ٹی ایس کو فعال بنا دیا ہے اب تمام تقرریاں میرٹ اور شفاف طریقے سے ہوں گی۔
انہوں نے کہاکہ عوام کے ٹیکسوں کے پیسے سے مراعات لینے والے کو حساب دینا پڑے گا۔ عوام کے ٹیکسوں کے پیسے کو ضائع نہیں ہونے دیں گے۔
