گورنر اسٹیٹ بینک جمیل احمد نے کہا ہے کہ آئی ایم ایف نے پاکستان کے لیے 7 ارب ڈالر کے بیل آؤٹ پیکج کی منظوری دے دی ہے۔
گورنر اسٹیٹ بینک نے اسلام آباد میں صحافیوں سے گفتگو میں کہا کہ آئی ایم ایف نے پاکستان کے لیے 7 ارب ڈالر کے پیکج کی منظوری دی ہے،پاکستان کو ایک ارب یا ایک ارب 10 کروڑ ڈالر کی پہلی قسط ملے گی۔
یہ بھی پڑھیں: آئی ایم ایف نے پاکستان کے لیے 7 ارب ڈالر کے بیل آؤٹ پیکج کی منظوری دیدی
اس سے قبل گورنر اسٹیٹ بینک نے میڈیا سے گفتگو میں کہا کہ رواں مالی سال مہنگائی کا ہدف 11.5 فیصد ہے، رواں مالی سال جی ڈی پی گروتھ کا ہدف 2.5 سے 3.5 فیصد تک ہے جبکہ کرنٹ اکاؤنٹ خسارہ 1 فیصد تک رہ سکتا ہے۔
یاد رہے کہ عالمی مالیاتی ادارے نے پاکستان کے لیے 7 ارب ڈالر کے بیل آؤٹ پیکج کی منظوری دی ہے، پاکستان کو 30 ستمبر تک 1.1 ارب ڈالر کی پہلی قسط ملنے کا امکان ہے، قرض پروگرام منظوری کے بعد دوسری قسط بھی اسی مالی سال آئے گی۔
یہ بھی پڑھیں: آئی ایم ایف کی تمام شرائط پوری کردی ہیں، جلد معاملات طے پاجائیں گے، وزیر اعظم
قبل ازیں نیویارک میں گفتگو کرتے ہوئے وزیراعظم شہباز شریف نے کہا تھا کہ آئی ایم ایف کی کڑی شرائط پوری کردیں، سعودی عرب، چین اور متحدہ عرب امارات کے شکر گزار ہیں، ان کے تعاون کے بغیر یہ ممکن نہیں تھا۔
